Il' ont des drôles dé bastaudes en Nouvelle Zélande, ieux. S'lon les nouvelles, un janne houmme a 'té blioutchi à Whakatane et s'sa poussé en justice pouor aver assauté un garçon atout un hérisson.
S'nou les appelle des hérissons, ou des hérichons, ou des couochons d'fôssé, ches mammiféthes n'sont pon d's annimaux înnouothants coumme i' l'sembl'yent. Les hérissons fûtent întroduits en Jèrri duthant l'dgiêx-neuvième siècl'ye, et d'pis chu temps-là il' ont mangi des lînmaches, des vèrs, d's êtchèrbots et d's însectes. V'là tch'a 'té bein pouor les gardîngnièrs, mais pus à co hôrribl'ye pouor l's însectes et p'tites bêtes.
Mais achteu, s'nou-s'est à craithe les nouvelles, les hérissons lus en vont m'nichi les gens étout. S'nou peut faithe sèrvi des hérissons coumme arme d'attaque, par ioù qu'j'allons arriver?
Ches bêtes à pitchets sont hardi dangétheurs, valet. I' n'faut pon aver trop d'peux par les c'mîns d'tchéthouongnes armés d'armes à feu ou d'pouongnards à vos êbieilli. Nan, car ch'est les reintchivâles prêts à vos stabber atout un hérisson dé tchi qu'i' faut s'mêfier l'pus.
À ches drein nou-s'a abafoué la Harriet Harman pouor aver mîns eune câsaque contre-boulets duthant eune vîsite dans san distrit à Londres. Sans doute, y'a tout pliein d'hérissons à Peckham. Et l'dèrnié ridgeu est qu'les terreuristes éthont trouvé eune nouvelle arme ségrète. Ch'est en tchi l'x-raiethie d'seûth'té ès aéroports et caûchies trouv'tha des armes à feu, des pouongnards, des brioches, des pînchettes, des chîsieaux et des cop'rêsses d'ongl'yes. Mais ch'est-i' qu'oulle identifiêtha des hérissons dêdgithés en brînges à g'veux? Ch'est eune vraie m'niche qué chenna.
Dgieu mèrcie qu'ch'est les hérissons tchi nos dangèlent. Înmaginnez si ch'tait des pors à pitchets à nos stitchi, ou d's armadil'yes à nos achouêmi!
Mais nou-fait, en véthité ch'n'est pon ches couochons d'fôssé tchi nos m'nichent, ch'est nous tchi m'nichons les hérissons. Les cacheurs d'vaituthes les êglianment par les c'mîns, et i' faut s'mêfier en brûlant des fielles s'tchies dans l'gardîn car les hérissons au S'tembre lus muchent dans les vieillottes tâssées pouor eune fouée. Et i' n'faut pon oublier qu'lé hérisson est l'anmîn du gardîngni, pas eune arme atout tchi ouapper san vaîthîn!
Geraint Jennings
Viyiz étout: