Fort Lauderdale,
Florida, U.S.A.
Lé 27 dé dézembre, 1980.
Moussieu l'Rédacteu,
Tant pus longtemps qu' nou-s-est hors Jèrri, tant pus nou pense à san janne temps, prîncipalement quand nou-s-est du rang des vièrs. Et nou sé d'mande où'est qu' toutes ches années-là sont hortes.
I' m'sembl'ye qué ch'tait hièr qué j'tais assis à la tabl'ye siez Papa à La Forge et qué j'viyais un portrait d'la Reine Victoria pendu sus l'châchais, et iun du Prînce dé Galles, pus tard Rouai Edouard Sept, et qué jé d'mandais à Manman s'oulle avait janmais veu la Reine.
La dgèrre des Boèrs, 'tait en allant dans chu temps-là. Ch'tait l'c'menchement d'l'année mil neu chent, et eune gâzette appelée Police News nouos montrait des portraits des batâles entres les Boèrs et les soudards Angliais. Nou criyait qué ch'tait împossibl'ye qué les Boèrs gângnîssent, viyant tch'i' n'avaient pon d'rouoge câsaques et d's'armes atout des baïonnettes au but du canon. J'm'èrsouveins d'penser qué j'éthais eune fichue peux d'aller en dgèrre mé-même viyant qu' j'éthais peux d'êt' tithé. J'n'avais autcheune idée qué quatorze ans pus tard j'tais prêt à aller à eune autre, ieune tchi s'en allait duther pus d'quatre ans.
Dans l'entrétemps l'sèrvice dans la Milice Rouoyale dé l'Île m'avait donné l'goût d'la soudardéthie. Mais la chose tchi m'veint à l'idée est la louoyauté et l'support des gens d'campangne pour l'armée Angliaiche quand le dgèrre 'tait en allant et l'enthousiasme quand les batâles comme lé Relief of Ladysmith 'taient gângnies. Et quand Winston Churchill s'êcapit des Boèrs tchi l'avaient fait prisonnyi et tch'i' s'en r'fut là-bas comme officyi. Et qué Lord Kitchener prînt lé c'mandement (dé Lord Roberts) pour en finni.
L'înmaginnâtion est âpre quand nou-s-est mousse, et comme j'vouos l'ai probabliément dit d'vant, les portraits d'la dgèrre montraient eune montangne appelée Spion Kop et y'en avait ieune dans Les Blianches Banques tchi lî r'sembliait. J'pouvais la vaie d'la f'nêtre dé ma chambre et j'm'înmaginnais qué j'viyais nouos soudards tither sus les Boèrs tch'etaient sus l'haut.
Et pis, j'eus la chance dé vaie un soudard Jèrriais tch'avait actuellement 'té à la dgèrre et tch'était en Jèrri en pèrmission, comme nou dit quand un soudard avait des vâcanches. Ch'tait au sèrvice des Matines à l'Églyise dé St. Georges, et ch'tait un St. Ouënnais, étout, et d'eune fanmil'ye dé la noblièche. San nom 'tait Adolphus John Bauche Arthur. Janmais j'n'oubliethai m'n admithâtion d'lî quand jé l'vis dans l'bel dé l'églyise dans s'n uniforme dé kâki, drait comme un pitchet. J'avais eune folle envie d'lî pâler d'la dgèrre, mais dans chu temps-là un mousse savait garder sa pliaiche et i' n'pâlait pon ès grand' pèrsonnes sans pèrmission.
La vie 'tait plieine dé choses mèrveilleuses pour un mousse à ch't' êpoque-là. Papa et Manman 'taient des vrais encyclopédies d'înformâtion, et Papa 'tait un fanmeux raconteux entouorre la vie en mé et à La Côte.
Ieune des grand' fêtes 'tait la séthée d' Guy Fawkes - prîncipalement quand y'avait un carnaval dévant brûler la fouée. Et la pratique dé la mûsique sus L'Pallion, auve lé Sieur George Steuber à la tête, touos les sièrs duthant la s'maine dévant la fête, nouos donnait du divèrtissement. Ou marchait à la tête du carnaval quand y'en avait iun. Malbro s'en va-t-en dgèrre, Mironton, Mironton, Mirontaine 'tait l'air qu' ou jouait l'pus.
Tchi belle vie, dans chu temps-là. Duthe, mais trantchil'ye et auve la joue souos yi pour les grand' pèrsonnes et mèrveilleuse pour les mousses tch'étaient tchuthieux d'lus sorte.
Pâlant d'dgèrre mé ramémouaithe qué j'appréchons d'la Nouvelle Année et du six d'janvyi, deuxième chent'naithe dé La Batâle dé Jèrri. Ch'est seux qué l's autorités responsabl'yes ont fait d's arrangements pour célébrer l'occâsion comme i' faut, et j'ai grand r'gret d'n'êt' pon en Jèrri pour vaie les festivités.
Les r'cits d'la batâle, avau l's années, m'ont hardi întérêssi et j'en ai pâlé gentiment dans plusieurs dé mes lettres. Jèrri peut êt' ordgilleux d'l'aver gângnie, chutte batâle-là, ayant dêjà 'té rangit du côté du Duc dé Nouormandie dépis 1204 pour tréjous, lé Duc dîngnement èrprésenté d'nouos jours par Sa Majesté la Reine Elizabeth Deux, Reine d'Angliétèrre et Duc dé Nouormandie.
George d'La Forge
Viyiz étout: