Le Ménage ès Feuvres,
St. Ouën.

Lé 21 dé juin, 1975.

Moussieu l'Rédacteu,

Ch'est vrai qu' les fossés sont barbus, et qu' dans les p'tites rues les côtés des motos sont tchiquefais freûlés par chutte barbe quand i' s'rencontrent dédans. J'ai r'mèrtchi ch'là mé-mème et v'la tchi m'a fait penser qué Moussieu l'Connêtabl'ye L'Mèrquand d'St. Pierre a p't-êt' ieu raison d'vouler proposer un projet d'louai pour les faithe tondre un mais l'avant. Sans doute, n'étant pon fèrmyi mé-mème, jé n'vai p't-êt' pon pus liain qu' man nez, mais quand j'en ai pâlé ès fèrmiers j'ai bein veu qué l'brancage démande l'ûsage d'eune main d'oeuvre tch'est aussi rare dans l'temps d'la dêfouithie des patates comme un janne homme sans barbe ou eune janne fille tchi muche ses g'nouors!

Dé chein qu' j'en vai, i' n'y a pon d'doute qu' les fèrmiers en sont vraiement à court, dé main d'oeuvre, et nou-s-en vait d'toutes les sortes sus les harvesters un mêlange d'Angliais, d'Brétons et d'femmes. Et lus habits valent la peine dé vaie. L'aut' jour j'viyais eune janne fille sus iun d'ches harvesters atout eune robe si courte qué quand l'vent la souôlevait nou c'menchait à aver pus d'întéthêt dans les bieautés d'la natuthe qué dans la récolte d'patates! Et bein, faut-i' s'attendre qué l'fèrmyi, tch'est au m'sespé quand i' vait des vrégies d'patates à dêfoui l'avant à li, et l'prix d'valer touos les jours, s'en va faithe sèrvi sa main d'oeuvre (dans bein des cas aussi faillie comme sa récolte mais quand-mème précieuse manque dé pouver en trouver eune miyeuthe!) à êmonder ses fosses à la pliaiche dé continnuer la dêfouithie?

Moussieu l'Connêtabl'ye L'Mèrquand a du couothage et nou n'peut sénon l'admither, mais j'crains tch'i' s'en va aver d'l'opposition quand san projet veindra d'vant L's Êtats, et tch'i' récoltétha pus d' contres qué d' pours parmi les membres tchi sont campangnards. Quant à mé, j'lî souhaite jouaie!

Eune chose tchi n'a pon changi d'pis qué j'tais en Jèrri l'année pâssée est qué j'vai bein pus d'pèrsonnes dans l's aubèrges qué dans l's églyises. Mais si j'proposais qué tchique membre d's Êtats présente un projet dé louai pour faithe les aubèrges donner la maîntchi d'lus profit ès églyises, ch'est à bein près seux qué l's églyises èrfûs'saient les sou viyant tchi v'naient du profit sus la bouaisson. Dans touos les cas nou dév'thait êprouver sus tchique sens à faithe en sorte tch'i' y'ait mains d'baithie ou bein i' faudra appointer un traîsième Juge dans la P'tite Cour pour pouver jugi touos les cheins tchi sont présentés pour aver cachi lus motos souos l'înfluence dé la bouaisson. L'temps pâssé, les jannes filles Cap'taines dé l'Armèe du Salut allaient dans l's aubèrges en ville au sé. Jé n'crai pon tch'i' convèrtissaient fort d'ivrouangnes, mais i' faîsaient la collecte et ramâssaient tchiques sou d'mème. V'la tchi m'donne eune idée tchi pouorrait p't-êt' d's'encouothagi les hanteurs d'aubèrges. Ché s'sait d'aver les Témoins d'Jéhovah à aller dans l's aubèrges touos les sièrs et l's apostropher comme i' font quand i' vont siez les gens. Ché s'sait eune oeuvre dîngne dé lus esprit missionnaithe, et j'ôse craithe qué v'la tchi f'thait les b'veurs en fîn d'compte rester siez ieux ou tchitter à baithe et dév'nîn Témoins!

En liêsant les lettres env'yés à la gâzette par des malcontents tchi d'meuthent dans les maîsons d's Êtats, et tchi craient tch'i' sont à payi trop chi pour lus louages, j'vai tch'il' ont des noms tchi n'sont pon Jèrriais. Ont-i' rêalisé tch'i' sont à louage à un bas prix tch'est subventionné par les contribuabl'yes? Et y'en a tchi sont tréjous à crititchi L's Êtats, et iun d'ieux suggéthait mème qué j'dév'thions nouos s'pather d'l'Angliétèrre. Tchi affront! Heutheusement, rêpondre des lettres dé mème et lus d'mander pourtchi tch'i' restent en Jèrri dépis tch'i' pathaîssent craithe tch'il est si mal gouvèrné. Mais ché s'sait eune pèrte d'temps, et nou finnit par sé consoler à la pensée qu' ch'est des pèrsonnes tch'ont l's idées, biscâsiées et un manque dé paids dans lus manches tch'ont des sentiments d'mème. S'il 'taient Jèrriais dans l'âme i' séthaient bein qué j'sommes dé la race tchi fit la contchête dé l'Angliétèrre, et qué j'n'allons pon nous en dêbarrasser et l'abandonner d'mème pour lus faithe pliaîsi.

Comme j'l'ai mentionné d'vant j'aime hardi r'garder les portraits dans la gâzette, et chutte fais i' y'en a un bé du Sieur René Liron dans la gâzette du dgiex-neuf dé juin. J'dis un bé car ch'est la preunmié fais qui j'ai veu un portrait d'li sans san chapé, et san r'gard né pathaît pon la maîntchi si aigre comme quand chu fanmeux chapé est jutchi sus l'haut d'sa tête!

George d'La Forge.

 

Viyiz étout: