San Antonio, Texas,
U.S.A.
Lé 20 d'janvyi, 1973.
Moussieu l'Rédacteu,
Nou créthait qu' auve lé progrès modèrne, lé sèrvice des postes îthait bein pus vite qué dans l'temps pâssé, mais ch'est vraînment l'contraithe. Est-ch' viyant qu' la quantité d'lettres et d'papièrs a tellement agrandi qué mème la multiplicâtion d'empliyés n'peut s'en d'menter? J'n'avais janmais veu l'affaithe si mal comme oulle est à ch't heu. Ichîn en Améthique, où'est qu' nou-s-est supposés d'faithe tout mus et pus vite qu' autcheun aut' bord, oulle est acouo piéthe.
Un livre dé généalogie d'la fanmille Le Moignan, dé tchi l'Révérend Michel Le Moignan, Tchuthé d'la Cathédrale du Christ-Roi à Gaspé, à La Côte, est l'auteur et m'en a fait présent, fut posté à Gaspé lé 27 novembre pâssé et arrivit ichîn avant-hièr. I' faut avouer tch'i' fut adréchi à Trenton, Michigan, preunmithement, mais i' n'y a pon d'raîson à prendre si longtemps en c'mîn. Eune lettre dé man vièr anmîn Joseph Le Floch, postée à Montréal lé 28 novembre, arrivit ichîn avant-hièr étout. Eune charmante lettre du Sénateur J. J. L'Mèrquand, postée en Jèrri lé 3 d'dézembre pâssé, arrivit ichîn hièr.
Et les gâzettes dé Jèrri? La dreine erchue ichîn est la cheinne du 23 d'novembre, 1972. J'n'ai veu rein des cheinnes du 28 septembre, 5 octobre, 12 octobre et 16 novembre. Ch'n'est rein d'nouvé. Si j'n'avais pon ieu des nouvelles dé mes bouans anmîns L'Maistre d'La Brétchette, à L'Êta, jé n'séthais pon tch'est tch'a gangni l's êlections pour Député. Et jé n'sai pon acouo tch'est tch'a gangni l's êlections pour Sênateu - sénon qu' j'ai eune idée qu' Moussieu Reg. Jeune est iun des gangnants viyant qué, dans l'articl'ye dé Madanme du Dû Banc, tchi raconte sén entréveue auve la femme dans l'Vièr Marchi dans la gâzette du 23 d'novembre, ou nouos dit qu' oulle embraichit l'Député Jeune pour li'aidgi à célébrer sa victouaithe. I' m'sembl'ye qué l'Député Averty vînt d'dans étout en liêsant ch't articl'ye-là, mais j'n'en sis pon seux. Enfîn, Moussieu Jeune eut la chance. Mais la charmante danme du Dû Banc a créé un précédent, et un tas d'hommes s'en vont êt' tentés d'prendre pour Sénateu à l'av'nîn!
Comme j'l'ai mentionné d'vant, la colonne des décès dans la gâzette mé donne souvent la triste annonce qué tchique vièr anmîn a pâssé l'pas. Chutte fais ch'est l'Sieur Clièment Rondé dans sa huiptante-deuxième année. J'allions aver les huitante-deux ch't année touos les deux ouaithe tch'il 'tais tchiques mais pus vyi qué mé. Quand j'allis l'vaie d'vant m'en v'nîn en Améthique - j'pense qué ch'tait lé 23 ou 24 d'octobre (j'tchittis Jèrri l'27) - il 'tait acouo tout riant. Ouaithe tch'il avait failli et c'menchait à aver d'la peine à garder rein en d'dan, i' pathaîssait liain d'êt' sus l'pus, et j'fus ravi d'vaie, dans la gâzette du 9 dé novembre, qué san décès eut lieu l'preunmyi d'novembre. Un charmant bouanhomme et bouan vièr Jèrriais d'la vielle êcole. Mes condoléances à sa veuve, et à san fis Cliément à La Nouvelle Zélande.
Èrvénant à la lettre dé l'Avocat (et Sénateu) J. J. L'Mèrquand. Ch'tait, pour mé, un grand pliaîsi d'la r'chéver sachant tch'i' n'n'a tant sus les bras tch'i' n'a pon l'temps d'êcrithe à san gré. Et pis sa lettre 'tait en Jèrriais, man bouanhomme, et bein êcrite dans chutte langue-là. Ch'est magnifique dé pouver s'entr'êcrithe dans la langue mâtèrnelle. Y'a tchique temps j'avais mentionné dans ieune dé mes lettres qué ma grand'grand'méthe avait connu l'temps qu' les femmes faisaient lus lavage au dou à laver ès Fontaines Martîn, ès Landes, à St. Ou. Eh bein, chu dou-là est justément en d'ssous du clios appelé La Fontaine Martîn tch'appartcheint au Sénateu, et i' y'a abrévé ses vaques bein des fais.
Dans sa lettre, il avanche eune raide bouanne idée. I' m'dit qué l'dou est couvèrt dé ronches, et qué ché s'sait întérêssant dé tâchi dé l'rêtablyi et d'èrgraie la pliaiche où'est qu' les femmes lavaient lus lînge lé temps pâssé. V'la tchi f'thait un arrêt intérêssant au bord du p'tit c'mîn qué L's Êtats ont établyi l'tou d'la côte en faisant sèrvi l'travas des prisonnièrs, et eune affiche pouorrait attither l'attention des visiteurs au dou et explyitchi sa raîson d'être. J'sis absolûment d'accord.
Tchi bieau rêve si nou pouvait r'tchuler l'temps et r'vaie la trantchilité du temps jadis en Jèrri quand l'seul brit qu' nou ouiyait l'tou des fèrmes d'Gros Nez, l'matîn d'un bieau jour d'êté, 'tait l'lappais d'la mé, l'chant des ouaîsieaux et les vouaix des femmes à bavarder en faisant lus lavages au dou ès Fontaines Martîn !
George d'La Forge.
Viyiz étout: