Fort Lauderdale, Florida
U.S.A.
Lé 15 d'avri, 1967.
Moussieu l'Rédacteu,
J'veins d'erchéver la gâzette du deux d'mar, et en liêsant ma lettre du onze dé févri, 1967, tch'est d'dans, j'ai dêcouvèrt eune mêprînse dé deux chents ans vèrs la fîn d'la lettre. Ch'est seux qu'les Sieurs Fraînque Le Maistre et Max Lucas lus en sont appèrchus, et qué s'il' avaient ieu l'temps i' m'éthaient env'yé eune lettre à mé l'dithe! En pâlant d'la tan'nie d'la fanmile Le Cras à l'Êta, j'dis qu'oulle est mentionée dans les r'gistres d'St Ouën en date du 17 juin, 1905. Lé neuf dévthait êt' un sept! La mention est en date du 17 juin mil sept chent chînq (1705). J'ai souvent ouï qu'les chiffres né mentent pon, mais né v'la un exempl'ye tchi prouve lé contraithe! Jé n'sai pon comment qué j'vîns à faithe eune mêprînse dé même. J'tais absolûment sobre quand j'l'êcrivis, pourtant! Enfîn, i' faut s'consoler l'esprit à la pensée qué l'homme tchi n's'est janmais trompé n'a janmais êprouvé à faithe grand' chose!
Comme ou' pouvez bein l'înmaginner, la preunmié chose qu'un Jèrriais en exil fait en ouvrant la gâzette est d'êgarder s'i' y'a tchitchun dans la colonne des décédés tch'i connaîssait, et chutte fais j'ai r'gret d'y vaie l'nom d'un bouan vièr anmîn St.Ouënnais - l'ancien Ph'lippe Francis Galliene. Acouo un aut' mio d'Jèrri houors à janmais! En avait-i' veu d'la vie du temps jadis a St Ouen, ch'tî-là! Nou n'peut pon passer la vielle pétite maîson d'La Votte à L'Êta sans penser en li, car i'y'avait d'meuthé longtemps dans sa jannèche. Pour li L'Étacqu'sé et l'Pûlé 'taient des noms d'chef-lieu , car i' d'meuthait entre les deux et les viyait matîn et sé touos les jours! J'lé viyais souvent l'êté passé quand j'tais à peindre les f'nêtres du Ménage ès Feuvres ès Landes. Touos les jours i' faîsait sa p'tite prom'nade du matîn, bein douochement, dé Little Farm jusqu'ès Pallièthes, en feunmant sa pipe. Si nou's'avait l'bonheur (ou l'malheur si nou 'tait prêssi!) dé l'rencontrer, i' s'adôssait contre lé fossé et y'en avait pour eune démi-heuthe à l'ouï raconter un tas dé p'tites sornettes du temps passé. Mais s'nou lî d'mandait autcheune chose entouor la pêque ou les mathées, il oubliyait les sornettes. I' s'y r'connaîssait, man bouanhomme! Dépis tch'il 'tait dans sa nénante-deuxième année, i' faut penser tch'i fut né en 1875, année d'la dgèrre Franco-Prussienne. J'm'èrsouveins qué quand j'tais mousse j'ouiyais les gens en pâler, d'chutte dgèrre-là, et ch'est r'mèrquabl'ye qué les Jèrriais dé ch't êpoque-là pathaîssaient êt' du côté des Prussiens, et qu'ieune des chansonnettes des mousses en allant à l'êcole 'tait Vive La Prusse - à bas La France!
J'vai qué l's accidents auve les motos continnuent, et comme j'l'ai mentionné d'vant, à m'n idée ch'est affaithe d'aller trop vite. Quand nou liet qu'un moto a bondé l'tchêne deux-s'trais fais dans la Grand' Route Victoria, et qu'un aut' continnuit c'mîn sus san dos pour eune chentaine dé pids auprès aver fait la calipette dans la Route dé St. Louothains, et qu'la janne fille tchi tapit dans l'pilyi à l'entrée du bel d'la Salle Parouaîssiale dé St Sauveux poussit l'pilyi siex pouces houors de pliaiche, et qu'un aut' moto r'bîndit d'un fossé à l'autre dévant pouver arrêter dans la Route des Laveurs à L'Êta, ou' n'allez pon m'dithe qué ches motoristes-là n'allaient pon bein trop vite! S'il avaient cachi lus motos à eune vitesse raisonnabl'ye i' né l's éthaient pon faits faithe la calipette et l'n'éthaient pon 'té à maîntchi êgliamis comme nou les vait sus les portraits dans la gâzette! Mais nannîn, i' faut aller à quarante milles à l'heuthe n'împorte-ioù! Quand tchi qu'les Connétabl'yes s'en vont d'mander l'autorisâtion d'affichi difféthentes vitesses accordant les routes et les lieux?
V'la tchi m'fait tréjous chose dé vaie des bouais abattus, et j'vai tch'i' s'en vont en abattre pour êlaizi la route au Rouoge Bouoillon. Ch'est danmage qué y'a tant d'fichus motos tch'il est nécessaithe d'êlaizi les routes et les faithe pérdre lus charmes et lus abris. En pâlant des bouais v'la tchi ramémouaithe qué quand j'allis en Jèrri en mil neu' chent quarante-six, au but d'eune absence dé dgiex-neuf ou vingt ans, j'm'en allis à Portînfer par beusse pour visiter la bouanne tante Vine. Quand j'avais tchitté Jèrri eune trentaine d'années d'vant pour aller à la dgérre et pus tard à La Côte, la Route dé Vinchelez dévant v'nîn au Mangni d'Vînchelez d'Haut 'tait absolûment couvèrte d'eune arche d'bieaux bouais pour eune bouanne londgieu. J'attendais fête dé la r'vaie d'même. A ma grand' surprînse, la beusse avait passé l'Mangni et jé n'm'en étais même pon appèrchu - viyant qu'les bouais avaient dispathu! J'pense qué ch'tait à cause de vieillèche et des d'gâts par l's Allemands tch'en copaient à tare-larigot. Heutheusement, il' ont r'cru et l'Vînchelez d'à ch't heu r'pathaît comme j'lé connaîssais d'êfanche.
Ch'est d'tchi si bé, qu'un bouais - si bé qué même tchique auteur fut inspithé d'compôser un chant en Anglais à san sujet, et l'vèrset finnit par dithe tch'i n'y a qué l'Bouan Dgieu tchi peut en faithe iun. Et pourtant combein qu'y'en à d'abattus au nom du progrès?
George d'La Forge
Viyiz étout: