Trenton, Michigan,
U.S.A.
Lé 22 d'févri, 1969.
Moussieu l'Rédacteu,
Quand j'vai l'tîntamârre tchi s'passe parmi l's êtudiants dans l's univèrsités ichîn en Améthique, et dans d'aut' pays étout - nou peut mème dithe un mio partout l'monde - j'mé d'mande si nouot' système Améthitchain d'vouler donner eune êducation si avanchie tch'i' faut env'yer touos les mousses ès univèrsités est vrainment sage et raisonnabl'ye. Eune chose est bein cèrtaine : Lé janne homme tch'a 'té ès êcoles et au collège jusqu'à l'âge dé vingt-deux ans ou pus, ès frais d'ses pathents, et tchi veint d'èrchéver l'diplôme dé Bachelier ès Arts, s'crait trop moussieu pour gangni sa vie à sa sueu d'san front! I' s'crait tchiquechose ch'tî-là, et si nou lî donnait eune pelle et eune bigorne - auve quémande dé creûser eune tranchie tchelconque - i' s'sait comme les j'vaux hieux tch'ont peux d'vaie lus sueu! Et j'en avons à gogo, d'ches moussieutîns-là! Il' ont 'té si accouôteunmés à faithe lé moussieu à l'univèrsité tch'i' pensent pouver c'menchi lus carrièthes au haut d'l'êtchelle et être au mains présidents d'maîsons d'conmèrce!
Pourtant, I' faut des travailleurs aussi bein comme des présidents! Et il en faut tchi connaîssent lus mêtchi. Quand j'tais mousse en Jèrri, la mannièthe d'apprendre un mêtchi 'tait d'êt' apprenti pour autant d'années comme il en fallait pour l'apprendre. Lé rêsultat 'tait qu'à la fîn d'un apprentissage ou-s-aviez un homme tchi connaîssait sa vocation comme i' faut. Mais i' n'avait pon gangni grand' chose jusqu'à chu moment-là. Ichîn, les jannes n'ont pon la pacienche d'êt' apprentis, car i' veulent gangni d'bouans gages du tout c'menchement. Ch'est en tchi, i' s'engagent comme aigues (helpers en Angliais) et apprennent un mêtchi à la longue par lé simpl'ye procés d'aîdgi à un homme dé vocâtion.
Dans tout chennechin, i' n'faut pon oublyiyer qué prèsque toute oeuvre et tout travas en Améthique sont sujets à la juridiction des sŷndicats travaillistes. Dans cèrtaines vocâtions, les sŷndicats pèrmettent un nombre lînmité d'êt' apprentis à des gages tchi sont aussi hauts comme les gages d'un helper, lé nombre étant lînmité pour tch'i' y'aie tréjous un manque d'assez d'hommes dé vocâtion disponibl'yes. V'la tch'est supposé faithe l'oeuvre en main duther pus longtemps et garder les gages hauts! Ch'est en êffet, eune stratégie tchi garde, pas seulement les gages dé l'ouvriyi, mais l'prix du produit, au haut nivé.
Quand j'tais mousse, un ouvriyi avait l'profit d'san maître à tchoeu, et du respé pour sa pèrsonne. Chutte couôteunme-là avait acouo pèrsisté jusqu'à un cèrtain point en Améthique quand j'y arrivis y'a quarante-chînq ans, et un ouvriyi tchi travaillait consciencieusement et tchi né r'gardait pon l'hôlouoge touos les quarts d'heuthe, et tchi n'avait pon peux d'sa peine, et tch'était prêt à donner chîn' munnutes dé pus d'travas à san maître pûtôt qué d'en lovier chînq, avait pus d'chance d'êt' fait contrémaître ou seurvillant qué l'ouvriyi tchi pièrcheûsait la maîntchi d'san temps. À ch't heu? Souos les règl'yes împosées par les sŷndicats, ch'est un péché pour un homme dé travailli dû, dé peux qu' l'oeuvre en main s'sait trop vite finnie, et à seule fîn d'la faithe duther aussi longtemps qu' possibl'ye!
Dans touos les pays y'a d's ouvriyèrs tchi travaillent mus qu' d'autres, comme i' y'a tréjous d's ênèrgiques et des pièrcheurs. L'temps passé, l'homme tchi travaillait dû 'tait censé valer pus à san maître qué l'fainiant et il 'tait payi accordamment, mais ch'n'est pon d'mème à ch't heu en Améthique. Les sŷndicats însistent qué l'pus failli ouvriyi sait payi les mèmes gages comme lé miyeu. Tout est mînt au mème nivé - lé bouan comme lé mauvais - et v'la tchi veurt dithe qué l'nivé baîsse hardi!
J'mé d'mande souvent pour tch'est qu'un homme tchitte la vie naturelle dé la campangne pour s'en aller d'meuther dans les villes et travailli dans les miyeux industriels souos toutes les règl'yes et tout l'tîntamârre dé la vie modèrne. Ch'est vrai tch'i' c'menche à gangni pus d'sou, mais l's exigences dé la vie d'la ville lé fait bein vite les dêpenser. Où'est tch'il 'tait satisfait d'aver un vièr moto dans la campangne pour porter ses lédgeunmes et l's oeufs au marchi, i' lî faut un moto du drein modèle en ville. Et pis i' s'en va faller sèrvi l'sien pour aller en travas et qu'ou n'en a pon pour faithe sa boutiqu'sie et p't êt' porter les mousses à l'êcole!
Quand il 'tait dans la campangne pour bein tch'i' fûssent habilyis proprément, les mousses ch'tait tout ch'tch'i' fallait. À ch't heu? En ville, i' lus faut d's habits spéciaux d'êcole tchi couôtent des sou! Et comme les mousses passent des boutiques à chucrîns et d'crème à la glace, et d'boutelles dé linmonnades dé toutes les sortes et d'toutes les couleurs en r'vénant d'l'êcole. I' lus fait tréjous un tas d'sou d'pouchette pour en acater en c'mîn. Et les filles ont acouo les talons jaunes quand i' d'mandent à lus méthes dé l's env'yer au salon d'bieauté pour aver lus j'veux graies!
Quant à mé, i' m'sembl'ye tout considéthé qué l'homme tchi gangne san pain par la sueu d'san front en plieine campangne a la pus naturelle, et, en fin d'compte, la pus belle vie!
George d'La Forge
Viyiz étout: