Fort Lauderdale,
Florida,
USA.
Lé 2 d'févri, 1980.
Moussieu l'Rédacteu,
Sâbre dé bouais! Comme lé temps s'pâsse! Nouos v'là dêjà dans l'mais d'févri, et i' m'sembl'ye qué ch'tait rein qu' la s'maine pâssée qu' nou 'tait à pendre sa cauche à côté d'la cheunm'née pour Papa Noué à y mett' eune orange et des codrettes.
En viyant l'bieau solé et la chaleu ichîn hièr, et les tas d'monde à lus bangner à la mé, j'pensais au Dictionnaithe Jèrriais-Français au Docteu Fraînque Le Maistre tchi nouos dit "Auve tant d'monde à lus bangner sus les grèves, la mé dait êt' sale quand veint un temps"! Mais, jé m'disais à mé-même, i' n'dait pon y'aver fort dé monde à lus bangner sus les grèves en Jèrri ches jours. Lé temps est probabliément trop frais, prîncipalement comme nouos v'là dans la fraid du mais d'févri.
En rentrant à la maîson j'eus l'pliaîsi d'trouver la gâzette dé Jèrri du 29 dé novembre à m'attendre, et la preunmié page fut l'portrait du nouvieau Gouvèrneux, lé Général Messire Peter Whiteley. I' pathaît êt' un homme dé belle présence. Mais chein tchi m'êtonne (jé n'peux même pon en r'vénîn!) est d'liéthe un p'tit pus liain dans la gâzette qué l'Gouvèrneux fit un discours en Jèrriais quand i' fut assèrmenté dans la Cour Rouoyale. Ioù dgiâtre tch'il a 'té apprendre lé Jèrriais, j'pensis? Prîncipalement comme i' fit sèrvi l'titre dé Messire quand il adréchit Moussieu l'Bailli, un titre tch'est tipiquement Jèrriais-Nouormand. Et pis i' m'vîns à l'idée qu' ch'est probabliément Sa Majesté la Reine tchi lî'a apprîns tout chenna, car étant Duc de Nouormandie ch'est seux qu' ou connaît la langue Nouormande. Enfîn, lé Général Whiteley a c'menchi si bein tch'i' faut craithe tch'i' s'en va faithe un fanmeux Gouvèrneux.
J'tais întérêssi d'liéthe les discours des membres d's Etats au sujet d'la sagesse d'aver des membres du Conmité des Finances à accepter d'êt' directeurs dé banques. Comme i' s'adonne, j'avons l'même problème ichîn en Améthique, sénon qu' ch'est pus séthieux ichîn viyant tch'i' peuvent êt' directeurs dé tant d'grand' maîsons d'conmèrce comme General Motors, Ford Motor Company et Chrysler autrément qu' des banques. Y'a ieu un tas d'trains au sujet dans l'Congrès à Washington, et i' faut qu' les membres dêcliathent des choses dé même à ch't heu. J'vai qué l'Député Le Main est d'amain, aniet comme démain, pour mett' la main où'est tch'i' y'a bésoin dé donner un coup d'main, et i' faut lî donner la main pour aver ieu l'couothage d'entanmer eune affaithe dé grand prîncipe dans L's Etats. J'espéthe tch'i' n'ont pon anglyicîsé un bouan nom d'même dans la Chambre.
L'affaithe dé mett' des téléphones, ès frais du publyi, à la disposition d's anciens tchi d'meuthent touos seurs a 'té la cause d'un tas d'discours dans L's Etats. I' fallut toute eune page dé la gâzette pour en donner un bouan rapport. Y'a l'pour et l'contre, sans doute, comme dans toutes choses. Ch'est seux qué l'Député Norman Le Bro est bein d's'appointé. Mais en liêssant l'rapport i' m'sembl'ye qué les Connêtabl'yes d'pâraisses en souangnent supèrbément, d's anciens, et jé suppose qué châque pâraisse est prête à mett' un téléphone, à ses frais, siez autcheune pèrsonne méthitouaithe tch'en a bésoin.
Ch'est r'mèrquabl'ye comment qué l's autorités d'nouos jours sont prêts à souangni d'la vieillèche et d'la pauvrété (eune pauvrété souvent engendrée tout d'abord par la pièrcheûtheté et l'manque dé couoyer et d'sauver pour les vièrs jours dé la vie) d's anciens, eune renvèrse des principes des anciens dé y'a huiptante ans quand eune pèrsonne pensait qué ch'tait eune vraie honte d'êt' sus la pâraisse. Mais i' faut donner san drouait au Député Norman Le Bro. Nou peut dithe tch'il est un bouan membre d's Etats. La lectuthe dé ses discours né m'donne pon l'idée tch'il est vrai Communiste. Enfîn, la Russie est dév'nue si forte en matchiéthe dé dgèrre tch'i' y'a crainte qu' ou s'en va faithe la contchête même dé l'Améthique iun d'ches jours, et si ch't' avârie-là s'arrive j'éthai la chance dé d'mander à Moussieu Brezhnev tch'est qu'en est!
George d'La Forge
Viyiz étout: