Moussieu l'Editeu,
La Merrienne m'ayant donné pérmission j'm'en fut au grand show en Ville Mêcredi, et quand je r'vint ou voulut savé tout-d'suite tchèsque j'avais veu.
"Eh bein," j'l'y dit, "y'avait d'bouonnes bêtes, et y'en avait tchéthaient tait aussi bein à la tèrrée, mais à prendre yun dans l'autre, nou n'pouvait pas s'pliaindre. Et, chose bein satisfaîsante, Merrienne, les Juges, pour une fais étaient généralement de m'n'idée, ch'est-à-dithe, y n'ont pas fait tant d'bêtises comme de couotume. Mais j'ai r'mértchi qué quant y'en a deux jeunes ensemblye, y sont bein longtemps à lus décidé.
"Y semblye," je continuit, "tch'ils ont un mio peux d'lûs opinion. Par exemplye, la classe de g'niches r'nouv'lées a print trais bouons quart-d'heuthe à jugi. Yun d'nos viers et yun d'nos jeunes, ch'est là l'vrai plian."
"Et y'avait-y du monde?" ou d'mandit.
"Oh, oui-djà. Le temps tait si bé, qu'y'avait une dguaingue de vîsîteurs et hardi des gens d'campagne étout. Ch'tait pûs comme les viers temps, sinon qu'nou n'viyait pas tant d'ach'teurs d'hors pays. Sans doute y veindront au mais d'Octobre."
Et l'Gouvérneux," ou d'mandit, "tait-y là?"
"Oh oui," j'l'y dit, "y tait la comme de couôtume, et sa Dame étout, et ch'est une triste pensée que ch'tait pour la dérnié fais, car y tchittent l'Ile dans p'tit d'temps."
"Tu peux l'dithe que ch'est une chose à r'grétté," oulle accordit, "et quant à mé j'voudrais savé pourtchi qu'je n'pouvons pas les gardé ocquo pour une pôse. Nou m'a dit tch'y voudraient bein resté, alors pourtchi qu'nos Etats n'disent pas au gouvernement Angliais tout net et cârré, que j'n'allons pas les laissi allé. Après tout, Ph'lip, je n'pouvons pas éspethé de r'avé un Gouverneux comme ch't'îchin."
"Ah, damme nan!" je m'fit, "Si jamais y'a yeu un vrai moussieu, ch'est l'y. E'rgarde comme il a tréjous tait intérêssi dans nos shows, pas seulement en ville mais dans les campagnes. et je s'y pérsuadé tch'il aime les Saint-Ouennais un mio mûs qu'tout l'restant. quant y'a yeu tchiquechose à Saint-Ou il est tréjous v'nu. E'rgarde comme y vint ocquo au show du mais d'Mai. Y faisait une fraid d'tchan, mais v'la tchi n'le gênait pas un brîn. Et à Piémont l's'autres années, au mais d'Janvi, jamais n'mantchait, et pourtant, pûs d'une fais nou crévait d'fraid."
"Vèthe," ou dit, "tout chonna ch'est bein vrai. epis, il est si av'nant. Y pâsle à tout l'monde, et pas seulement ès grands mêssieux. Je crai, véthitablyement tch'il est autant à s'n'aise pâslant à un fliantchet d'fèrmiers comme s'il tait dans l'palais d'la Reine. Il a tréjous tchiquechose a propos à dithe en autchune occasion et en autchune compagnie. Bein seux qu'Jêrri s'en va l'mantchi et surtout les fermiers."
"Par sa photographie sûs la gâzette," j'l'y dit, "le sien tch'y s'en va l'rempliéchi pathait un tout-à-fait charmant corps."
"Nou n'peut pas jugi par des photographies," ou dit. "Dans m'n'album dans l'grand parleux, m'n'onclye Laïesse a l'appathence de yun d'nos bouons viers prédicateurs d'aut'fais, et ch'tait un fripon fini. Mais enfin y faut attendre à vais. Y ne s'sa pas p't'être tant pièthe, mais jamais n'vaudra l'moussieu qu'j'estimons tant et qu'j'allons perdre si vite. Crais-tu, Ph'lip, que même ach'teu, si nos fermiers pétionnaient - ?"
"Nânin, ma vieille," j'l'y dit. "Seux et certain que n'y'en éthait pas yun tch'y ne s'sait pas prêt à signé, ou à mettre sa crouaix, mais che s'sait perdre san temps, car il est bein trop tard. Chein tch'y nos reste à faithe che s'sa quand l'jour veindra tch'il étha à s'n'allé, de bèthe à sa santé et d'l'y souhité tout bonheur et toute prospéthité pour le restant d'sa vie."
"Amen a chonna!" s'fit la Merrienne.
Ph'lip
Les Chroniques de Jersey 22/8/1953
Viyiz étout: