Bien! Té v'là, té, Pièrre! j'dîs à Pièrre Touzé hièr matîn quant i' passit par siez nous en s'm'allant r'muer ses vaques: Vethe dgia: i' m'dît: J'sis bein content dé t'vaie, car j'voulais té d'mander t'n'avis. J'ethais 'té siez l'Connêtabl'ye mais j'ai ouï tch'il est malade et jé n'veur pon l'embêter. Ch'est au sujet d'ma cache. Tu sai bein qué ch'tait eune belle cache lé temps passé: Vethe, j'lî dis: Et oulle est acouo belle! P't'êt' bein, i' m'dît: Mais, dépis qué l's'All'mands copîtent les bouais ou' n'a janmais 'té la mème. L'fossé a êcroûlé à deux-s-trais bords et les fortes plyies d'à ches drein ont dêgradé la cache. L'y-a longtemps qu'ou' n'a pon 'té r'graie.
"Eh bein, Pièrre, j'li dis: Ergraie-la! Tu sai bein comment t'y prendre, - tu n'as pon besouoain dé m'n'avis! Mais ch'n'est pas pour ch'la qué j'voulais t'n'avis, i' m'dit: L'aut' jour Miché Vaucourt, dé St. Brélade, vînt m'vaie en r'vénant d's' ormèrs à la Crabbiethe. Quant i' vit la cache i' m'dit qué j'dév'thais êcrithe eune lettre ès Etats pour lus faithe à saver dans tch'il êtat qu'oulle est, et tch'i' veindraient la r'graie aux frais d'l'île! I' pathaît qu'ch'est eune nouvelle louai. Peux-tu m'aidgi à êcrithe eune lettre, té qui t'y r'connais?
T'en as, té, d'l'espérance, man bouan-homme! j'lî dis: Ergraie ta cache ès frais, du publyic! Et pourtchi que l'publyic paithait pour garder ta cache en bouan êtat? Mais ch'est la louai, ach't'heu! i' m'rêponnit! Man pouor' garçon j'lî dis: Ch'n'est pon acouo eune louai. Dgieu mèrci qu'j'avons acouo tchiques membres dan l's'Etats tch'ont un mio d'avis! V'la tchi fut proposé l'y-a tchiques sémaines, mais i' fut décidé d'louogi l'affaithe au Greffe! Nous y v'la ! i' m'dit: Quant eune louai est passée oulle est louogie au Greffe pour qué l'Greffyi la mett' dans l'grand livre ioù tch'i' garde toutes les louaies d'Jèrri! Bah! j'li dis: Tu-es pus bête qué poule! Ch'n'est pon d'mème du tout! Quant un projet est louogi au Greffe, ch'est pour donner eune chance ès membres d's'Etats d'l'examiner et d'l'êtudier pour saver tch'est qu'en est quant i' s'sa présenté dans l's'Etats pus tard. Dans l'entrétemps, les membres peuvent y r'fliéchi et décider s'i' vont voter pour ou contre!
Mafîngre, s'fît Pierre: J'n'avais pon comprins qué ch'tait d'mème, mé. Ch'est vrai qu'nou n'est janmais trop vièr pour apprendre. Enfin: Tch'est qu't'en crai, - s'en vont-i' voter pour? Bouan Dgieu sait, j'lî dis: Pour dé mé, j'sis contre, tréjous! Bon! i' m'dît: "Nou vait bein qu'tu n'en as pas, té, d'cache. J'sis raide pour, mé. Ch'est bein au mains qué l's'Etats m'aiguent à r'pather ma cache! Bah! j'lî dis: Acates eune demié-douzaine dé viages dé gravi d'Maît' Jean Fiot d'la Mouaie, et r'graie ta cache té-mème! T'en r'path'thas à millieu marchi au but de compte. Iun d'ches jours l's'Etats éthont l'contrôle dé tout, et tu paiethas tant d'împots tch'i' t'faudra touos les sou qu'tu fais sus tes patates pour les payi! Lé millieu Gouvèrnément est l'chein tch'i' gouvèrne le mains possibl'ye. Tant pus qu't'est gouvèrné, tant pus ta liberté dispathaît et l'y-a tant pus d'papièrs à rempl'yi. T'èrvé-tu à rempl'yi un papi dans tchi qu'i' faut mett' combein d'bouais qu'l'y-a dans ta cache, - combein d'brîns d'gravi qu'tu l'y-as mîns dépis lé s'tembre passé, - combein d'pas qu'tes vaques font quant il' y passent matîn et sé en allant paître au clios et r'vénin à l'êtabl'ye, - passes-tu par là quand tu vas faithe la carre à ta hardelle, - tch'est qu'est la londgieu et la laize, - est-alle trop êtraite pour y faithe servi l'gros roûleux, et Bouan Dgieu sait tchi d'autre?
George d'La Forge.
1951
Viyiz étout: