L'chein qui tqient est aussi bon
Comme le chein qu'êcorche;
Ch'est une ancienne opignon
Qui reste ocons en forche.

Si nou vait un tous bein joué
Ch'est par un homme d'égllise,
D'chapelle ou quiq chose d'ité ;
Ache-t-heu tout l'monde en dvise

Afin d'attraper les sots,
Aller à la chapelle ;
Faites mîne d'être dévots,
La happe en s'sa pus belle.

Ayiz l'air d'un homme de sens,
A qui jamais rein n'manque
Montrez de bouans sentiments,
Etabllissis une banque.

Souengniz d'ramasser des sous,
Nimporte d'qui mangnere;
Mais ayiz bein l'air etou
D'une conscienche cllaire.

Quand ous airez réussi
D'aveugller tout la monde,
Hallez votre êpîle du ji
En fraudant à la ronde.

J'ai oui qu'nou ne devrait pas
Mettre un cat marchand d'graisse ;
Je vnons d'en vais un biau cas,
A la dviner j'vous laisse.

Un Jersiais
La Lanterne Magique 1/3/1873