Quand nou liet les nouvelles, nou pouôrrait quâsiment craithe qu'lé Chef Minnistre est à fliatter un blianc cat dans eune grand' cave ségrète tchique bord dans l'Île et à complioter un maît'-plian pouor contchéthi l'monde. Ou, auve touos les rapports dé caméras s'grets et êpieurs par les c'mîns, ch'est-i' "M" tch'est en chèrge du gouvèrnément d'Jèrri? Acanté ofûche "Q" dans l'Dêpartément du Transport et des Sèrvices Techniques?
En Ville, j'avons des caméras êpieurs mâtés par les c'mîns, et des caméras dans d's êcoles et des boutiques et d's offices. J'y sommes accouôteunmés au jour d'aniet. Mais quand nou ouait qu'nou fait sèrvi eune vaithuthe êpieuse dans les par à vaituthes, nou sé d'mande si ch'est d'l'êpiêthie ou d'l'espionnage. Ch'est au mains un souôlagement qu'les cheins tchi travâlent pouor l's Êtats n'sont pon pouor achteu, coumme James Bond, pèrmîns dé tuer!
Y'a tant d'caméras par les c'mîns et nou-s'est tant filmé, ch'n'est pon ravissant qu'nou ouait ou liet l'brit qu'les grôsses têtes sont à complioter contre l'citouoyen paîsibl'ye. Et chenna sustout s'nou-s'a 'té à filmer des gens par 'chîn et par là en s'gret. Car ieune des justificâtions pouor chutte filméthie est qué v'là tchi dêcouothage les tchéthouongnes, les reintchivâles, les blégèrdes, les tchèrnaches, et les laiduthes. Mais si les malfaiteurs et poltrons n'sont pon dgèrnis qu'nou-s'est au dget, i' n'y'a pon d'itelle chance qu'i' saient dêcouothagis.
Ch'fut l'9 d'Mai 1840 quand la dadgèrrotype fut mouontrée en Jèrri pouor la preunmé fais. Ch'est pôssibl'ye qu'eune dadgèrrotype faite chu jour-là d'l'églyise dé Saint Hélyi fut l'preunmié photo prîns en l'Île. D'pis chu temps-là, combein d'portraits ont 'té prîns par des Jèrriais, des vîsiteurs, des touristes et toutes les manniéthes dé gens? Et achteu auve des caméras dans les téléphones dé pouchette nou peut êt' photographié autchun bord.
Raîque pouor vos ièrs? Y'a des doutanches, car nou vait tout partout. L'yi du maît' fait pus qu'ses deux mains - la tchestchion est tchi qu'est l'maît'.
Tout coumme, si à la fîn y'étha janmais un casino en Jèrri, ch'es'sa sans doute lé "Casino Royale".
Geraint Jennings
Viyiz étout: