Les Pages Jèrriaises

Jerriais de l'ancienne race

Air: Scots wha hae wi' Wallace bled


Jerriais de l'ancienne race,
Permettrions-je à l'audace
De conseil ou de parlement
D'changir not' gouvernement?
Au nom de notre patrie,
Tuos ensemblle que nou crie,
Quand nou veurt nuos faire un dro,
Halte là! Haro! Haro!

Cesserons-je d'être braves,
Deviendrons-je des escllaves?
Chu jour jamais nou ne le verra
La liberté flleurira.
Jaloux de notre naissance,
De notre drouait la jouissance
Contre tous je maintiendrons,
Je le f'rons, ver', je le f'rons

A notre ancien r'nom fideles,
D'la libertè sentinelles,
Montrons not' résolution
D'maintnin la constitution:
Tuos ensemblle comme un homme
S'rêvillant d'un mauvais somme,
Hardis d'coeur, fermes de bras,
Crions Haro! et Houras.

PL
6/4/1875

Aut' vèrsion modèrnîsée:

Jèrriais dé l'ancienne race,
All'-ous pèrmettre à l'audace
D'un membre dé parlément
D'changi not' gouvèrnément?
Au nom dé not' patrie,
Touos ensembl'ye qué nou crie,
Quand nou veurt nouos faithe un dro,
Halte là! Haro! Haro!

Jé cêss'sons-t-i' d'êt' braves,
Jé d'veindrons-t-i' d's escliaves?
Chu jour janmais nou né l'vèrra
La libèrté flieuthitha.
Jaloux dé not' naîssance,
Dé not' drouait la jouissance
Contré touos j'maintcheindrons,
Jé lé f'thons, véthe, jé lé f'thons

A not' ancien r'nom fidèles,
D'la libèrté sentinelles,
Mouontrons not' résolution
D'maint'nîn la constitution:
Touos ensembl'ye comme un homme
S'rêvilyant d'un mauvais somme,
Hardis d'tchoeu, fèrmes dé bras,
Crions Haro! et Houras!

PL
6/4/1875
 

Viyiz étout:

 

Les Pages Jèrriaises