O, vous tous qu'avez grand sé, v'nez ès ieaux; et vous qui n'avez pas d'sou, v'nez, acatez et mangis; v'nez, j'vos dis, acatez sans sou, et sans autchun prix, du vin et du lait.
Pourtchi qu'ou' dêpensez des sou pour chein qui nouorrit pas, et vot travâs pour chein qui n'donne pas d'satisfaction? Êcoutez-mé attentivement et 'ou' mangerez chein qu'est bon, et vôtre âme jouitha avec pliaisi dé chein qui 'y a dé miyeu. Faite attention, et v'nez à mé; êcoutez et votre âme vivra; et jé f'thait eune alliance êternelle avec vous, pour garanti la miséricorde accordée à David. Car, j'l'ai êtablyi comme témoins auprès des peuplyes, pour être lus chef et lus conducteur. Et tu învit'tas la nation qué tu n'connaîs pas; et les nations qui n'té connaissent pas s'apprech'chont avec vitesse, pour l'amour dé l'Eternel, ton Dieu, et du Saint d'Israel, qui t'etha glorifié. Cherchez l'Eternel tandis qu'i' s'trouve. Priez lé au moment qu'il est près d'vous. Qué l'mêchant abandonne sa maniéthe dé vivre et l'homme înjuste ses pensées, et qu'i' r'veinne a l'Eternel qu'éthe pitchi d'li, et à nout Dieu, car il pardonne abondamment. Mes pensées n'sont pas comme vos pensées, et vos vouaies n'sont pas mes vouaies, dit l'Eternel. Car autant qué les cieux sont pus hauts qué la tèrre, autant mes vouaies sont pus hautes qué vos vouaies, et mes pensées pus hautes qué vos pensées. Car comme la plyie et la né veinnent des cieux, et n'y r'touannent pas, sans aver arrosé la tèrre et l'aver faite gèrmer et produithe, pour donner la s'menche au s'meux, et du pain au sien qui mange. Ch'est la même chose avec les mots qui sortent d'ma bouoche, i'n erveindront pas à mé, sans êffet, sans aver fait chein qu'j'ai voulu, et fini l'travas qui lus aver 'té destiné. Car 'ou' sortithez avec jouaie, et 'ou' s'sez condits en paix; les montagnes et les monts chant'tont avec des cris dé jouaie d'vant vous, et touos les bouais des clios applaudithons. A la pliaiche dé l'êpine craîtra lé sapin, et lé myrte rempliaich'cha les ronches, et ché s'sa eune glouaithe pour l'Eternel, et un signe perpétuel et à janmais.
Viyiz étout: