Jerri, l'mais d'Août, 1904
Hélas Mess Bisson, - Ch'la vos quatouolle assez pour vos faithe grigni, vous, dites; et bein pas mé, j'eunne trouve pas chonna du tout risibl'ye.
Quand ou viyis une femme qui vend dans l'marchi acater des groiesilles pour 6 sous l'pot et les r'vendre 6 sous la pinte ou vos imaginez que ch'est simply'ément là une occasion pour mettre un paragraphe comique dans votre gazette!!
Ah! man puorre Mess Bisson, j'n'éthais pas creu chonna d'vous, qui passêtes jusqu'ichin pour être un ammin des fermiers, mais, coumme disait l'aôtre:- Tche'st qu'che'st qué d'nous? J'pensêmes, nous fermiers, d'aver au mains une gazette qui d'fendait nos intéthêts; et bein nou fait d'jà, ou nos d'sertez pour rithe de nous et nos v'là pliantez-là oquo une fais.
Oh, ou trouvez qui ya matchèthe à rithe, vous, Mess Bisson, quand une marchande vend des groiesilles sièz sous la pinte oprès qu'ou'l a yeu l'apliom' d'abafoué le puorre minzéthable fermi en n'yen donnant pas pus que tant l'pot, et mettant dans sa propre grand pouchette dé d'vanté dé d'vier 2 à 3 chents pour chent profit! Mais êche don si drôle comme tout chonna?
Ah! je n'mé ravis pas qué nou s'êplieuthe, le vilais pour payi trop pour sa marchandise et le campagnard pour n'en aver pas assez! et ch'est vous, Mess Bisson, en nos distant dé tchi qu'ou trouviez “drôle,” qu'avez montré ès uns et ès autres comment qu'nou l's'abafoue. Sans doute, tout l'monde ne sont pas marris, sustout les siens qu'en font des riselées et les siennes qu'y font l'profit.
J'pense bein que vot' buonne-femme d'ervenderesse est yunne de chès-là qui nos dit, quand j'l'y'offrons des légumes, du beurre ou du fruit: Oh! j'peux pas vos en donné pus man chier homme; sou savêtes l'embarras qué j'avons à nos en dêfèthe. Personne n'en veurt, il en veint des masses dé d'hors, de France et d'Angliéterre, et chèst à peine si les villais veulent nos en donner le prix que j'vos en pèyons!
Et pis quand l'villais veint; nou lis dis: J'puorrais pas vos les donner à meins, les fermiers nos en d'mandent des prix fos et chést bein d'la chance si j'pouvons nos y r'faithe!
Hélas, Hélas, tch'est qu'chest qué l'fermi Jerriais, man puorre Mess Bisson; ch'n'est qu'un enclyumme - pour que d'autres batttent lus fièrs dessus!
Criyis-mé,
Elie
Nouvelle Chronique de Jersey 31/8/1904
Viyiz étout: