- Not' galveaudeux couorait si bain
Qué Man-Ségneur, lé viyant d'loin,
Crut tout-à-bouan dé vès
Un lièvre à deux dguérets !
- "Holà ! holà ! Douard !" criyit l'Sir',
Au pag' qui pâsait sans rain dir',
"Ouêqu' tu t'en vas,
"D'un si grand pas ?"
Lé rustr', sans s'arêté,
Ni mêm' sé dêtouanné -
Coum' tchiqu'un qu'est prêsi -
Erpondit d'san gôzi :
"Chêque, à matin, j'ai yeu
"Un p'tit garçon, Mousieu !" . . .
- Dé ch't-erpliqu' lé Ségneur
En rit à puré d'sueur.
Ossin, dé 'rtou dans sa maîson,
I n'avait rain dé pus d'saison,
Qué d'raconté à sa maintchi
La nouvell' qui y-avait fait gi :
"D'vin'rais-tu bain, ma rein',"

Dît l'Sire à sa Chât'lain',
"Chain qué j'vains d'vès ?"
- "Nannin, man tchoeur,
"Dis-mai chain qu'ch'est,
"Si chêqu' tu veur."
- "Jé vains d'vès chu long Douard Sétèr
"Ch'vaûchi dans nos cach's coume un chèr,
"Et ch'n'est qu' d'à-matin, m'a-t-i dit,
"Qu' d'un garçon i-l-a acouochi ! . . . .
"Asa, quand Madam' s'est tchiqu' fès
"Trouvè' dans un 'tait cas,
"I y-a falut au-mains deux més
"Dévant qu'ou d'cende à-bas !"
- "Tu dait l'savé, "
Erplitchit Madam' tout' chotchie,
"Qué j'peux m'pâsé
"D'tan niolin èt d'tés vilainies !
"Vraiement ! tu vains tchiqu'chos' dé bouan,
"Dé m'comparé à un mahan !" . . . .
- La Chât'laine indignie s'en va
Et laiss' Man-Sir' pétrifié là !

J.D.R.
St.-Héyé, Nov. 1864.