|
Ch'tait l'occasion d'un grand souper, Iou qu' prannait part tout un troupè Dé campagnards; les uns d'St-Ou Et d' aut's tchi v'naient dé jé n'sai iou. Les hôtes avaient prîns bein d'la peine (Comme dans la fabl'ye dé Lafontaine), "Lé régal fut fort honnête", Car rein né mantchait à la fête. Assis d'un côtè dé la tabl'ye, Nou vit un cèrtain Connêtabl'ye S'accapather d'eune friandise, L'enfouânnant avec gourmandise; Ch'tait vraiement extraordinnaithe Tch'i' s'comportîsse d'eune telle manniéthe, Et l's învités voulîtent saver Tchi motif tch'i' pouvait aver. Quand, la bouoche plieine, i' rêponnit, Chein tch'i' lus dit les êttonnit; "I' veint un temps qu' ch'est malheûtheux Dé vaie qu' nou-s-a molli d'ses feux, Mais, garçons, n'pèrdons pon couothage, N' y a rein itè comme du fromage! Ch'est p't-êt' du niolîn qué j'vos dis, Mais v'là ma femme - démandez-li!" Quand un vièr corps dé septante ans, Tchi s'lamentait dépis longtemps, Ouït mentionner un r'miède patheil, V'là tchi lî fit dréchi l's ouothèlles; I' s'décidit, "séance ténante", Dé l'êprouver, arrive tchi pliante; Et, comptant qu' v'là tchi f'thait la trique, En acatit d'la même fabrique. Il en mangit et en mangit, Si bein qué l'corps li'en dêrangit! Mais quant au r'miède si souvérain, Ch' fut un fiasco, i' n'en fut rein; Ch'est tout d'même împardonnabl'ye, Dé vaie qu'un homme tch'est Connétabl'ye S'amuse à faithe d'itès accraithes A un pouôrre dgiâbl'ye septuagénaithe! |
Viyiz étout: