La Fête dé la Cand'leu est célébrée l'deuxième jour du mais d'Févri comme lé prîncipal festîn du calendri d'l' Adouothâtion C'meune à la mié-hivé pouor deux'trais raisons.
Preunmiéthement, ch'est eune célébrâtion dé la Présentâtion du Christ dans L'Templ'ye au vièr prêtre Simion. Il èrconnut Jésû comme Lé Messie et sa prièthe d'actions d'grâce (lé Nunc Dimittis) dêcrit Jésû comme "la leunmiéthe pouor êcliaithi les nâtions”. La couôteunme don d'donner des chandelles alleunmées à châque membre d'la congrégâtion c'menchit dans l'églyise médiévale et d'vînt la Cand'leu.
S'gondement, la Fête est nommé la Purificâtion d'la Vièrge Marie, pouor les r'lévailles, un sèrvice à la fîn d'quarante jours auprès l'accouochement – d'même; quarante jours auprès lé Jour d'Noué s'trouve lé deux d'Févri. Étout, ou sèrt comme un împortant jour d'întégrâtion entre les Fêtes dé Noué et d'Pâques.
Traîsièmement, en Jèrri, la Cand'leu, (autrément app'lée la Chand'leu, la Chand'leuthe, et la Chand'luthe siez les Grouvillais), mèrtchait lé c'menchement d'la vraicqu'sie, gouvèrnée par la louai du preunmié d'Févri. D'vant la Preunmié Dgèrre Mondiale l'pus souvent toute la fanmil'ye soulait aller au rotchi ès taillaisons, mais v'là tchi s'pratitchait d'mains en mains jusqu'en mille neuf chent chînquante.
Et d'nouos jours, tch'est qu'i's'pâsse? Quand tchi qu'nou peut tailli du vrai? Au mains, nou peut êcliaithi les nâtions en satchant eune alleunmette. Véthe-dgia, ch'est mus d'alleunmer eune chandelle qué d'traiter la nièrcheu!
Ralph Nichols
Viyiz étout: