La pouore Missice Voirie est bain malade.
Et v'là si longtemps qu'ou traîne qu'oulle a 'té la cause de bain d'la gêne et d'anxieté à ses gens, sans pâler des ênormes dêpenses qu'ils ont fait pour êprouver à la r'djethi.
Derniéthement, ou n'a fait que d'enpiéthi et l'autre jour i' fut décidé d'aver une importante consultation entre les difféthents docteurs qui l'ont soignie et tchiqu'uns des pus près pathents de la famille.
I'y avait des Juges, des Ministres, des Députés et des Connaîtablyes, tous des gens qui lus comptaient à la hauteur de lus mission et absolument compétents de contrôler le traitement des souffrances de la pouore malade.
Ph'lippe Haut-Bain, li, était d'opinion qu'il 'tait grand temps d'la haller de souos les soins d'un tas d'charlatans, et d'la pliaichi dans un hopita central ouest qu'ou s'sait souognie par un spécialiste diplômé souos la supervision d'un Comité compétent. Il 'tait tout-à-fait prêt à admettre que Jack Piné avait assez bain réussi de li arrêter un cancer qu'oulle avait sus l'estoma, mais i' voudrait bain saver pourtchi djantre qu'i' y avait mins un empliâtre de tathe sus l'êpine dorsale et qu'il l'avait r'hallé deux jours opprès.
Quant au Connaîtablye des Pierrots, i'n'y avait que deux ans qu'il 'tait en poste et i' s'fit glouaithe d'une d'gethîson dont réelement, tout l'credit était deu à san prédécesseur et à un spécialiste qu'avait emplié un r'miède êfficace mais qu'en avait r'chu autchuns ermerciements, mais au contraithe, avait 'té traité d'achocre et m'nichi d'être fliantchi à la porte.
La malheutheuse invalide était entre les mains d'un tas de tout-se-mêles qui hallaient tous dans de difféthentes directions. Iun li coppait les g'veux pour li dgéthi des r'frédeuthes qu'oulle avait ès pids. Un autre li donnait un lavement parcequ'oulle avait ma ès dents et un treisième passait un rouleux à vapeur par en d'sus d'sa carcasse pour li êcavi ses frouets, et ainsi d'suite. Il tait grand temps, dans l'inthéthêt d'la pouore victime, de mettre fin à tout chenna, et il en fit la proposition.
Le Député Gris partageait la même opinion. Avec l'aide de san chauffeur, il avait d'shabillyi la malade et avait condit un examen minutieux. Quant à la partie d'san corps qu'était souos la régie du Connaîtable des Pierrots, i' n'y avait pas grand' chose à dithe, mais quand i' vinrent à sonder la région au Docteu L'Angliais, san chauffeur li dit comme chenna, “Mêfious! Y a tchiquechose ichin qui n'est pas bain!”
Et de fait, i' trouvithent les traces d'une opéthation scandaleuse. A bain des bords i' y avait des creux que nou pouvait y fouorrer san poing et des pliaies qui n'avaient pas la mîne de vouler lus r'dgéthi.
Là d'sus le Docteu L'Angliais se djuffi et s'êcryi! “Examinez-la au jour d'annièt, ou trouvethez les choses bain difféthentes.”
Le Député Gris malgré l'interruption, insisti que la miyeu chose à faithe était d'mettre la malheutheuse Missice à l'hôpita et appeli sus la famille de l'faithe immédiatement.
Et i' fini par erciter d'la poësie.
Le Député des Pierrots était d'opinion li, que d'vant que d's'en aller faithe des bêtises, i'valait mus tâchi d'aver tchiques renseiguements sus la matiéthe en tchestion. Il avait ouï pâler - n'importe comment - que Missice Voirie avait une pathente en Dgernesi qu'avait dêveloppé les mêmes syntômes et que selon touos les rapports oulle avait été dgéthie. Eh bain, pourtchi pas envier les douze Connaîtables la vaie et li d'mander de lus faithe part de san r'miède?
Jack Piné était de ch't avis-là ettou, mais les autres membres de la famille ne voulithent pas en ouï pâler.
Quand vint un temps i' fallit bain arriver à une décision d'un sens ou de l'autre, la pouore malade souffrait tout l'temps lyi et quand ils eurent tous fini d'voter nou dêcouvri que par une majorité d'une vouaix seulement, i' fut rêsolu que Missice Voirie restetha souos les mêmes docteurs comme devant, chest-à-dithe qu'i' y en aitha douze à la dêchither un châcun à sa dgîse.
Quand la pouore minséthe se pliaindra d'aver des cors ès pids nou li hal'la une dent, et dans l'cas qu'ou vaindrait à souffri d'une appendicite, et bain, nou i' coppetha les onglyes de ses ortès.
Souos les circonstances, la d'géthison compliète de l'infortunée invalide est une chose absolument problêmatique.
Caouain
1924
Viyiz étout: