Pouor achteu l'affaithe est morte dans les paraisses et de politique nous n'dit mot.

Hardi d'nos gens sont allés à l'Eisteddfod et j'pensais d'vos en dithe deux ou trais mots, mais couomme l'Sieur Caouain est touot particulièrement intéressi dans chunna et que touote la s'maine il a té hors d'sa niche, j'aime mus ly laissi vos raconter dans la gazette de Samedi tchi veint chein qu'il en pense.

J'couonnais un oisé dans la paraisse au maître des Prés, qui s'en va en être pour son ètchu.

Il y a tchique temps de chunna, quand il apprins que Gédéon avait prins partie de ménage à l'oncle Sam, y s'fit que chutte fais l'oncle Sam n'avait pon grand chance de faithe de sous à rompre la bail, car Gédéon était ieun de ces oisiaux a tchi nous n'fait pon peur et qui aiment mus se jutchi sus un éputhas que d'couorre de peur.

Couomme y faisait dithèt r'merques à ieun de ses vaisins, l'Phlip d'a coté de siez ly, Phlip s'fit qu'nous n'pouvait pon dithe chein qu'en s'rait. Et notre homme de ly répondre qu'il tait prêt à gagi un ètchu que Gédéon finirait la bail.

Eh bein, il en s'ra pouor son ètchu viyant que la bail a été rompue dans une office d'Hill Street, et il y a tchiques jours de chunna.

Y faut dithe èttout que chunna fut fait viyant que Gédéon a acaté un ménage et p't'être bein que l'Philip n'aura pon son ètchu de si tot viyant que ch'n'tait pon d'même que son vaisin entendait chutte gageaille.

D'pis la bordée que l'oncle Sam failli s'nier dans la barrique à ieau d'pluie qui capsizi sus ly, l'affaithe était trantchille dans l'vaisiné, mais deux ou trais fais j'entendis l'brit de vaissiaux brisé et des d'vis qui m'fites craithe que pouor seur l'oncle Sam n'tait pon d'buanne humeuthe.

J'pense bein qu'achteu que la bail est rompue qu'il n'en s'ra pon mâri.