Il y a des visites qui vous font hardi pliaisî
Il y a des visites qui vous font hardi pliaisî et d'autres qui font l'pus grand plaisi quand la visite est finie!
Pouor vos dithe la vérithèt ch'tait ieunne de chutte dernièthe catégorie qui s'passi l'autre semains, dans la paroisse iou que l'boss en trembliai rein que d'y penser mais en tressauti d'jouaie oprès qu'oulle fut finie.
Ch'est que viyous, nous n'sait jamais chein qui peut en être quand les pus grands de Jerri lus déshallent d'la Cohue pouor s'n'aller en visite de même car nous n'sait jamais chein qui peuvent épignotchi pouor faithe mâ. Et j'sais bein qu'il y en eiutes qui eurent une bé mauvaise nièth d'vant l'grand jour.
Touot alli d'charme mais j'voudrais bein savèr pouortchi que ieune des grands fit la r'marque qu'il tait tchutieux d'vais que les siens qui avaient lus signe sus l'papi paraissaient quassiment aver la même écrituthe.
Pouortchi dithèt r'merque? Faut y craithe que chu grand avait ieut vent des sornettes qu'nous avait fait couorre dans la paraisse à l'entouor des siens qui n'sont pus d'chu monde de misèthe et qui oubliytes d'laissi lus merche d'vant d'lus en aller pouor l'grand viage?
Des acraithes touot chunna, Moussieu, oprès touot d'pis qu'ils taient d'la même paraisse ils allites à la même èscole et apprites a èscrithe d'la même manièthe avec la même encre et la même plieume et n'v'la touot... chein qu'nous peux dithe!!
* * *
Il y a tchique temps d'chunna, un homme fort embarrassé ch'tait l'enregistreur d'ieunne des paraisses d'amont. Il y avait tchi s'en haler les ch'veux d'la tête, ver l'p'tit qui ly reste.
Viyant qu'il avait dans l'idée d'faithe un p'tit trip en France, d'vant d's'en aller y prépari touot pouor un mariage et l'ayant rempli y s'n'alli l'porter à son député... enregistreur, bein entendu, et pon au député de sa paraisse qui n'a rein à y faithe.
La séthée de d'vant l'jour termé, tchi surprinse lorsque l'sien qui d'vait s'faithe mathier s'en vint dithe que n'v'la qui n'pouvait pon s'faithe.
Et pouortchi don? Pouortchi? Ch'est que tchiques heuthes de d'vant nous avait r'chu un présent de neuches qui avait tout capsize; car avec un p'tit ouineux nous n'peux pon tréjous faithe couomme nous veut et nous n'pouvait pon aller en carosse ou à pid jusqu'à l'Eglyse!!
Tchi faithe achteu? car ch'tait dans le livre des mariages qu'nous avait touot écrit, et ch'tait l'sien des naissances qui fallait déshaller achteu! Tchi faithe?
Nous alli trouvé l'buan bergi de chutte paraisse et ch'est ly qu'arrangi touot. Mais j'gage bein qu'une autre fais l'enregistreur de chutte paraisse n'e s'ra pon si pressi a remplir san livre sans s'faithe seur que tout est alright!
* * *
L'harbour master de La Rocque s'd'mandait chein qu'il y avait et l'buanhomme Bill, qui était à l'entouor de ses tomates, s'd'mandait èttout ch'est qui s'en allait en être.
Ch'est qu'il y avait de tchi être énervé, car l'pouorre Sam faille s'nièr!
Encouore une fais il tait en ertchin et mârri quant à son vaisin quand n'v'la t'y pon qu'il eut l'malheur de trébuchi et de tchès raide dans une toube à ieaue d'plie placée au pignon d'la maison!
N'criyous pon que n'v'la qui était plus qu'assez pour faithe crier même des brées!
* * *
P't'être bein que vous n'allez pon m'craithe mais fouai d'Marie Hibou ch'est la pure, pliaine et entièthe vérithèt.
D'pis tchique temps un propriétaithe d's'envithons du Mont Cochon s'trouvait trop failli pour aller s'promener au sé, couomme de coutume, et l'mâ fit de tels progrès qu'il fallu qui garde le lièt.
Nous appeli un docteu qui s'fit que ch'tait un couommenchement de paralysie, mais nous voulu en saver pus long et un autre docteu fut appelé qui n'tait pon du même avis en touot.
Enfin, ennièth d'vais qu'il n'y avait pon d'changement et voulant saver d'tchi des deux docteurs avait raison, la buanne femme ieut une idée et tandis que l'pouor buanhomme dormait oulle prins une aidjuille et pitchi l'talon de son buanhomme!! Achteu oulle est convaincue que si ch'est la paralysie pour seur que chutte paralysie n'a pon frappé la langue de son buanhomme!!
Et encouore une fais chunna est la pure vérithèt.
Caouain
1924
Viyiz étout: