Y faut que j'vos raconte la triste affaithe au pouor Cliem, qui est un raide buon corps de sa sorte, fouai de Marie Hibou et j'espèthe que quand vous l'aurez lue couomme mé vous aurez pitié de ly.

Ch'tait il y a trais ou quatre s'maines. Cliem ennièth d'vais de jeunes gars envièth des pierres sus son shed, s'mucchi et erconnu ieun des siens qui faisait dithèt vilain travas. Touot drait il allit s'pliaindre au chantgni qui, ly, fit appeler notre gars, un jeune corps qui dans un temps voulait être frégattin. Quand l'chantgni ieut oui les explications de chu frégattin mantchi, y n'pouvait en craithe ses oreilles car y disait qu'nous avait donné tchicques coppeurs pouor jeter des pierres chu une autre bâtisse et que ch'tait Cliem qui avait fait chunna pouor n'pon aver recours à l'Officier d'la Cour pouor mettre son locataire à la porte. L'pus bé de l'affaithe ch'est que chu gars dit qui pouvait amener une douzaine d'autres jeunes corps pouor prouver chein qui disait.

Viyant chunna, y fut décidé que touot chu monde se réunirait dans l'Parish Hall, iou qu'il y a pus d'run et iou qu'nous déciderai de l'affaithe et d'la pliainte à Maître Cliem.

Tchès que vous voulez que l'pouorre Cliem puisse faithe viyant qu'il y avait quassiment une douzaine de jeunes mousses contre ly et qui disaient touos la même leçon que le frégattin mantchi? Ly, Cliem, était tout seul à protester. Il y avait tchi s'arrachi touos les crins de la perruque si la perruque qui possède dans la paraisse à mon biau cliochi n'tait pon d'pierre!

Tchique s'mêle de tout ly d'mandi pourtchi qui sortait au sé. Cliem aurait pu ly répondre que ch'tait s'ses affaithes, mais nennin, Cliem n'est pon d'même et a chu tchthieux il réponni que ch'tait viyant qu'il avait des rhumatismes et qu'il ly fallait un miot d'air frais et de rosée.

Enfin, pouor vos dithe, l'pouorre Cliem, qui avait porté plainte, fut l'sien qui perdi l'affaithe. Pouor arrangi tout, y vouli chaqui d'main, mais nennin, l's autres n'taient pon de chut avis. Nous décidi qu'une bille d'un louis mise dans la boîte pour les pauvres s'rait mus.

Et si vous voulez saver pouortchi que le lendemain au sé Cliem avec sa grand' casaque, vu les vents d'amont, alli d'porte en porte du bord d'la Rocque avec l'chantgni, d'mandez ly, mais pouor seur chu n'tait pon pouor ramassi des vouaies car y n'veur pon de poste dans la paraisse.

Quant à la bille d'un louis, j'espéthe que d'ichin p'tit temps il en aura autant à ercever qu'il y a de creux de clious dans les muthaîlles du louage cause de touot chut embarras.

Tout chunna est une bein triste affaithe, car Cliem n'f'rait pas de mâ à une mouque et j'sis bein seur que se s'ra avec plaisi qu'il apprendra qu'il a la sympathie de chutte pouorre bête qu'est Marie Hibou, qui peut aver la becque trop longue, mais n'veur de mâ à personne.