Les Pages Jèrriaises

Samedi passèt, j'vos disais qué j'tais...

Samedi passèt, j'vos disais qué j'tais dans la pâraisse du grand Abbé de Cart'ret. Ch'tait y'a tchique temps d'chounna que j'y fut. Vèthe, eunne séthée iou qui 'taient treîs anmins pas bein llien d'l'Egyse et qué j'en ouï iun qui disait : Ma pathole, nan, jammais j'n'ai trouvai un miyieu travaillaeux qu'té. Et mé, au clliai d'la lunne, i' m'sembyi que daeux hoummes s'entre-embrachîtes. Pour vos dithe le vrai, j'n'en sîs pas bein saeux, car l'homme dans la lunne sé muchi drièthe un bouais dans chu moment-la.

Mes bouannes gens, tch'est qui y'a don dans chutte pâraisse. Fouai d'hibou, j'ai veu d's'hoummes muchîs drièthe les tombiaux dans l'chimetièthe. Chein que j'vos dit, ch'est la puthe véthitèt, car j'les ai veus mé-maimme et occouo d'pûs, j'sais bein iou qui d'meuthent.

Tch'est qu'tout chounna veur dithe, car ch'n'est siez B.T. qu'ou trouvethez des gens ovec les D.T's. Nan, j'y ai tèt d'pîs qué l'parlaeux est ergrès et j'vos assaeuthe qué tout est numétho iun. Pour de mé, je n'crai pas un mot à un tâs d'niollin que j'ai entendu par là.

Chein qu'j'ai à vos dithe pour annièt, car bétôt les affaithe caouf'thont dans chutte pâraisse, et j'pense bein qu'les viaux s'en vont être bein engraissis pour la fin de ch't'année. Eh bein ! chein qué j'veur dithe, ch'est à Mess Broffy qu'nou devthait en pâslé.

Nou m'a dit qu'nou z'apporte de la pierre de la Crète au dépôt entre l'Egîse et l'arsenal. Ou' savèz bein, quâsiment dans l'mitan du mont.

Vous m'craithèz s'ou' voulèz, mais j'ai ouï qui disait : Tchi drôle de travas tout d'maîme. Nou' apporte de la pierre de la Crète au dépôt, et unne fais qu'elle a tait cassèe i' faut la chéthié sus la maîme route pour la mettre à Gouorèt. V'la tchi fait deux milles que les ''Cocottes'' à l'inspecteur ont à faithe pour rein, car ou' viyis i' pouorraient bein la faithe cassé à la carrièthe et les inspecteurs de Longueville en éthaient ieu.

D'un autre bord, chouna j'ai l'ai ouï ètout, mais je n'lai pas veu, la pierre de Philip-ès-Maltières est chéthièe jusqu'au pi de l'Egîse iou qu'il l'a chavire.

Mé, caouan, bête s'il en fut, iou ça, je le sai' bein, car nou' l'a assez dit. J'pense que les inspecteurs ou les siens qui sont responsables pour chu travas ont bein raison.

Vèthe, bouannes gens les rouelles des vétuthes ècrase la pierre et n'y-a pas besoin d'aver le steam-roller pour faithe la job.

Ne v'là, j'pense, qu'est un bouanne idée et ch'est pour chouna, à m'n'vis, qu'ils font bein de chéthier toute chutte pierre pour l'y douner une p'tits promenade dans la pâraisse devant la faithe servi'.

***

J'vos dithais bein d'aouates choses que j'ai ouïes, mais tout chouna dait être des mentis et j'n'en crai pas un mot. Quand je veu mé-maîme, p't'être que je ne taithai pas ma bec. En attendant garçons, à bétôt.

***

La médaille pour By Jim est acatée et tout St. Louothains va pouvé tressauter d'orgyi d'avé lus prumi inspecteur des qu'mins avec une médaille.

Si ch'tais les siens qui vont la présenter j'attendrais la visite royale du meis d'Juillet pour le faithe.

Tchi belle cérémonie garçons.


Caouain
19/2/1910
 

Viyiz étout:

 

Les Pages Jèrriaises