Mardi au sé, j'tais jutchie sus ieun des trais bouais d'la paraisse au Captain a tchi que les paroissiens s'ront obligi d'faithe un présent d'Noué... d'un autre p'tit rât, quant j'vit deux ou trais grands d'la paraisse s'n'allant, d'visant du bord des China Quarries.
J'pensi: Marie, chest de chu bord d'la paraisse que l'affaithe bouoge pour chantgniers et pouor seur nos gens n'lus déshallent pon pour l'plaisi d'aver la gorge assètchie par l'ponsi.
Tchi surprinse pouor mé en viyant l'grand docteu d'la paraisse s'en v'nir tout drait d'Avranches et entrer èttout siez Ernest!
Chest t'y que l'pouorre Ernest s'rait malade, qu'il aurait les mumps, la rouogeole ou la coqueluche, que j'pensi à mé même. Pouor dithe la vérithèt, j'eut quassiment peur d'm'approchi mais touot d'même j'alli ès écoutes.
Couomme l'docteu n'd'mandi pon à Erny de ly montrer sa langue, chein que tout buan docteur d'mande tréjours pour saver si nous a la fièvre, j'fut un miot rassurée et j'pensi ch'est pour l'élection que chu docteu est ichin car ch'est ly qui s'en va proposi Erny, à chein qu'nous dit.
Y d'visait en anglais et il y avait tchique chose qui n'allait pon, car deux ou trais fais y s'y fit : "They wants a Centenier in the Valley."
Quant vint un temps y d'mandi à Frainque chein qu'il en pensait et... pouor n'pon dithe chein qu'il en pensait – Frainque réponnit que ch'tait mus d'laissi l'candidat en décider! Viyant que sa candidature n'pourrait pon s'guérir d'la fièvre de la Vallée, Erny décidi d'rester sièz ly pouor n'pon attraper de mâ à canvasser dans chu district.
J'comprends qu'Edouard n'en est pon mârri, car avec une faillie saison d'patates coumme chutte année, y faut ergarder iou qu'nous met ses sous.
Il y a en a qui sont mârris de tout chunna et qui s'd'mandent s'il n'y aurait pon moyen de trouver tchiques pommes de Romeril pouor satisfaire leur sé.
J'alli au meeting pouor chantgniers dans la paraisse à mon biau cliochi et chest que Robert m'fit grand peur. Quand l'boss d'l'office arrivi y s'mint à crier, en pliene assembliaie, s'il vous pliait: "N'v' chein l'Caouain!" Et mé qui était mucchie souos l'portico du collège j'criyais qu'il avait veu ieunne de mes plieummes et qui m'prenait pouor l'Sieur Caouain.
J'oui Charles d'viser en anglais et ch'est qui lus en raconti... oprès aver été ré-élu.
J'sais bein, mé, qu'il y eut hardi de marcherie pouor aver une bordée d'élection et que trais s'maines d'vant l'meeting nous alli sièz Jordan pouor ertenir s'n'auberge mais qu'ly n'voulu pon faithe de promesses d'vant d'être seur. Ch'est un oisé qui aime mus t'nir que d'couorre et chutte fais y fit bein puisque d'election il n'y aura pon en tout.
L'p'tit Samuel de Rozé habite trop près d'la paraisse d'a côté pouor être candidat à effriter les siens en office, mais j'crais que si la saison des patates avait été milleure ily aurait ieu du feu de satchi et l'affaithe aurait cauffé raide, pouor seur.
Ch'est qui faut s'rappeler qu'Edwin vient d'la terre d'Egypte qu'à tréjous fouorni d'buans guerriers et si Edwin avait voulu prendre, j'n'sais pon chein qui en s'rait advenu.
Enfin, d'pis que l'affaithe est settlée y faut mus taithe sa becque sus chein qui s'passi d'vant l'meeting et que j'sais bein.
Fouai de Marie Hibou, à la préchaine assembliaie dans chutte paraisse y s'en va y aver du fun et d'la cacquetterie. Y faudra que Cliaude lus dise chein que nos gens veulent faithe avec les nonante louis ou quassiment qui s'trouvent achteu à la banque car il y en a qui sont d'avis qu'nous pouorrait avec ces sous payi la musique...... dans l'Temple!
Ch'est ès Capelles – non pas dans les chapelles – qu'nous espèthe faithe hardi d'sous pouor l'Eglyse d'la paraisse iou que Moussieu l'Recteur est bein aise d'aver l'parish hall pouor ses services.
Si chutte grande fête pouor chutte p'tite paraisse n'réussit pon n'v'la qui n's'ra pon manque de membres de Coumitté.
Au prumi meeting nour proposi que touotes les dames présentes fassent partie du Coumitté et n'v'la qui fut adopté à l'unanimité.
Pouor seur, si la couosine Trachy avait été là oulle aurait dit que ch'tait une buanne occasion de montrer que les femmes de Jerri peuvent s'grée sans hommes mais quant touotes les dames futes réunies y faut craithe qu'ils n'futes pon de chut avis car y fites l'compliement à des hommes d'la paraisse d'les nommer sus l'Coumitté.
Achteu vous comprendrez pourtchi que quasi la maintchi d'la paraisse ès sus l'Coumitté qui comprend pus dè chinquante membres.
Si avec touot chunna l'affaithe n'va pon d'charme eh bein mé qui n'sis pon du Coumitté j's'rai hardi surprinse.
Vèr, j'ai oui tchicque fais pâsler de tcherrue à tchans mais j'n'en ai jamais veue.
Marie Hibou
28/7/1923
Viyiz étout:
