Les Pages Jèrriaises

I' semblle que j'ai rajeuni ch't'hivé

I' semblle que j'ai rajeuni ch't'hivé. Et coumme ma natuthe s'pyaie dans des bâtisses à la maintchi en d'lacre et y-ou qu'ya moyen d'entré et sorti à m'n'aise, j'me nichi âyeur, là tchi l'ont plianté des "lime trees", parce que l'affaithe est hardi au nu, pour mé, et les vers qui sont dans l'chimetièthe n'em vont pas à l'appeti. Ch'est pourtchi, cause d'allé âyeur.

J'ai tèt dans l'alentou de "Greenhills", oprès du Mont d'l'Ecole, au Coin Vau rein, et coumme j'tais jutchi oprès du mont, dans l'pré à John, j'avais faim ! fouai d'honneur ! et sai !

J'apperchu unne belle fontaine à drouaite du qu'min et j'mapréchi pour bèthe. Mais pas pour mé, car i' y-avait unne bête de niaie d'dans, qu'avait du pé, un lapin, n'savont pou aussi bein qu'mé, vous qui vont y bèthe.

Quand j'ai veu chounna, j'nai pas voulu y bèthe ; j'fut au vivi à John.

J'men rappelle que y-a tchique temps y-avait des cottes le long d'un canné qui couaithait ès Waterworks de sièz Mess Simon, et chein qu'en fut.

Depis je veu d'autres choses d'enviè' dans la fontaine, et j'vos assèuthe que vous ni mé n'y béthais pas.

Pourtchi qui n'y-a pas hai à bouchi la fontaine ? Les gamins n'pouorrais pas envié rein d'dans.

Un jour, j'tais dans l'haut d'l'Ecole à èpinotchi un rat quand ne v'là deux messieur v'nin oprès d'mé ; tout près. J'avais paeux d'êtes veu.

Iun disait : Pourtchi qui n'y-a pon peintuthe sus l'bouais, et de vitre es f'nêtre ? Et r'gardant les muthailles, dit : Il y pieut ! Il y faudra d'grands frais au pus vite ! Tu dev'thais t'en otchupai.

Deux ou trais jours pus tard, ne v'là un autre grand haut Mess tchi y-ali. I' pâthaisai v'nin en pâssant. J'cré qu'il a d'la terre tout près de d'là parce qu'il laisse sa vétuthe au bas du Mont quand i' va vais ses j'niches. Je m'aperchu qui r'gardi bein allentou d'li, et j'sai qui fait partie des treize qu'ont l'soin des propriétés q'nou appele St. Anastase et St. Mannelï.

Tchi dommage de vais coumme chun chin es délabré.

J'en vititai d'autre partie en crutchant une betchie de temps à aotre.

***

Ch'est j'entends. Des jeunes gens ont fait l'tou d'Jerri à pid ? Oui, et pis des gas qui sont sortis d'unne ville d'un grand Evêque.

Y'avait deux sergents, deux fermiers, un counter jumper, coumme nou dit en angliais. Ch'est pourtchi la longue maison de tchi que l'grand bouais l'y garde l'Abri tait représentèe à chutte expédition.

La Lize avait preins les précautions d'acater des tarts et des oranges pour san frèthe qui s'n'allait les tchité pour chu long viage (?)

Enfin, nos héros tchite Jerri ! non, de lus pâraisse, j'veur dithe, et s'en futent dans l'Ouest, touchant es Eglîse en passant.

Arrivée à St. Louanthains, Walteur se mint à dithe qu'il avait unne poulette qui l'y faisait mâ. I' continuirent à marchi jusqu'à la fin de lus course.

Rarivèe de vier 3h. 30, un grand dîner tais à les attendre sièz le seigneur d'unne bein haute ville. Après l'frico, mangi, ces globe trotters (?) s'en fûtent se couochi, à l'exception tchique-uns d'yeux, pour se r'poser, couomme étant le jour de repos, j'crai bain !

Demain, chés experts pouorront êtes veues et admithés, car où savèz la bordèe de d'main, souos un si grand patronage, ou savèz bein y-ou, par lus chants par musique, si vos pliaît, car j'cré pas qui peuvent chanté sans livre de musique. Il éthaient deu invité le Czar de … … car i' pathaît qu'il aime le chant.

Les reporters s'ront là pour copiait les noms des patroneurs et les chanteurs, pour les mettre sus les gâzettes.

Caouain
26/2/1910

 

Viyiz étout:

 

Les Pages Jèrriaises