Y'a bein d's années jé fis un seurvais des nids d'mauves, lé "goéland argenté en Fr. (Larus argentatus), lé tou des côtes dé l'Île. Ch'la ch'tait devant la dreine dgèrre; et jé l'fis, chenna, comme i' faut deux ans d'affi, pouor compathaison. Ché n'fut pon du tout aîsi, car à part du dangi à ramper dans les falaises i' fallit saver s'y prendre. Y'a à bein des bords, par exempl'ye, des droques dans ches falaises où'est qu' nou n'peut dgéthe arriver pouor compter les nids. Eh bein, man système fut dé jouôter des pièrres du pus près pouor dêrober les mauves en l's êparpillant au vol en l'air. Comme ch'la étout, j'pus arriver aussi près qu' pôssibl'ye au compte dé la populâtion d'mauves en entchi. Jé savais qué quand les poules lus levaient du nid les mâles né restaient pon à tèrre ni n'tout. Là, don, j'comptais; et, en maintchillonnant l'nombre jé savais combein qué v'là tchi faîthait d'nids. Jé prouvis ch'la bein des fais, en faîthant la même chose dans les falaises où'est qué j'pouvais aller compter les nids autrément. Et pis, comme j'ai dit en c'menchant, jé fis chu seurvais deux ans d'affi, au r'nouvé, en mil neuf chent trente-six et mil neuf chant trente-sept, et mes chiffres la deuxième année accordaient à bein près auve les cheins dé l'année dé d'vant.

J'ai souvent pensé d'publier chenna, mais v'là tch'a tréjous resté d'côté jusqu'à ch't heu, comme bein d'aut's choses. Enfin, v'là tchi f'tha un r'cord assez întérêssant, j'ose espéther, et p't-être qué tchitch'uns d'autre voudront y r'êprouver dans tchique dêtou. Là nou vèrrait s'i' y'a ieu grand changement dans eune affaithe dé pus d'trente ans.

Jé m'souveins qué dans ches temps-là j'éthais bein voulu étout faithe un seurvais des cormouothans, mais i' fallit laissi couôrre l'idée pouor difféthentes raisons. Ch'éthait 'té bein pus difficile, car hardi d'ieux lus muchent dans des racoins, mais à part ch'la bein des piêches 'taient tithés quand v'nait lus temps à couer au r'nouvé, pouor faithe sèrvi d'bète dans les cliavieaux à honmards. Chein qu' j'appelons l'cormouothan est lé "cormoran huppé en Fr. (Phalacrocorax aristotelis).

Y'a deux "colonies d'godes, ou pîngouîns comme nou l's appelle étout, au Co d'la Rocque à Ste. Mathie et au Nièr Godîn ("Le Noir Godin ") souos La Gabouothell'lie à St. Ou. Et lé seul lot d'poffins, du maîns tch'i' soulait y'aver, était tout près L'Creux Gabouothé étout.

Quant ès pie-mathentes, j'en comptais dans les chînquante nids seulement, lé tou d'l'Île. Dans l'hivé i' s'affliotchaient pouor la niet lé tou d'la Rocco, dans l'ouêst.

Né v'chîn à ch't heu lé récensement entouor les nids d'mauves, et jé pense qué ch'est la toute preunmié fais qué ch'la ait 'té fait et publié. Dithons enfîn qué les mauves font lus nids sus les côtes du nord dé l'Île sustout.

Nou sait bein sans doute tch'i' y'a eune racachie d'mauves étout lé tou des Mîntchiers et d's Êcréhos, des Pièrres dé Lé et ailleurs en d'houors. Ches'-là vont et veinnent, bein seux, et v'là tch'en fait l'nombre pus grand.

Pouor finni j'veurs èrcorder eune note entouor des mauves, du 3 d'janvyi mil neuf chent chînquante-trais. Ch'tait un sanm'di l'arlévée par un temps bein fraid et atout un fort vent du nord-vouêt, ouaithe qué l'solé lithait bein eune fais l'temps. J'ét'tchions à brîsi iun d'nouos clios du côté d'la Gabouothell'lie, et quand s'vînt un temps chié n'talt qu' mauves souotre la tchéthue et partout l'clios. Nou n'n'avait janmais veu tant souotre la tchéthue, dévant ni d'pis. Et, en les comptant plusieurs fais, y'en avait dans les 600! I' sembliait qué toute la populâtion d'la côte du nord dé l'Île était là. Dé tout bein n'y'avait qu' deux maûvettes, ou tiquelesses comme nou l's appellent étout à St. Ou (Larus ridibundus), dans l'fliotchet. La raison, probabl'ye, qué toute chutte racachie s'abattit sus l'clios (un clios d'siex vrégies), j'pensînmes dans l'temps, est qué j'tions bein seux les seuls chu sanm'di l'arlévée-là à labouother d'la tèrre sus toute la côte pouor cèrtaines raisons, mais sustout à cause tch'i' v'nait d'tchaie d'la plyie à bein près toute la s'maine et qué quâsi toutes les tèrres étaient trempées à n'pouver aller d'ssus, sans pâler d'y mettre la tchéthue.

Par un St. Ouonnais

Viyiz étout:

• L's ouaisieaux en Jèrriais

• Les Mauves