Certains des membres du Comité pour l'Education éprouvithent l'autre jour à induithe les Etats à abandonner tout-à-fait la Ferme d'Expériences et à renvier siez-li l'Expert Agricole qu'en à l'soin.
I' voulaient dithe que les fermiers de Jêrri n'avaient qu'faithe de tout chenna et que che n'tait pas la peine de payi des hauts salaithes à d's hommes scientifiques pour venin ichin lus apprendre à craître des patates.
Malgré qu'la Salle des Débats était remplyie d'un assez grand nombre d'fermiers, à l'exception de iun ou deux, cheux-chin ne prinrent pas part à la distchussion, mais laissithent la Bataille ès ministres d'l'Evangile, des messieux qui êvidemment, ont l'intéthêt du fermi pus à tchoeu que n'a l'fermi li-même.
Les r'merques de tchiqu'uns d'entre ieux firent prendre le paîvre au nez du Député des Pierrots, qui lus dit tout carrêment que s'il avait besoin d'autchuns rensiegnements quant à la production d'ses récoltes ou quant à la manièthe de soigni san bestchas, i' n'îthait bain certainement pas consulter san Recteur.
Enfin tréjous, opprès une longue distchussion, pus ou mains interêssante, i' fut décidé que nou n'pouvait pas trop bain congédier un homme de Science comme nou f'thait un simplye domestique, et qu'i' valait bain mus garder ses services et si en cas, li baîlli une autre ferme à travaillyi, puisque la sienne actuelle ne pathaissait pas se prêter convenablyement ès expériments nécessaithes à l'êducation du fermi.
Quand l'chef ervint d's Etats il 'tait remplyi du sujet et quémenchi à exprimer ses veues dans la boutique, à touos les siens qui voulaient l'êcouter.
Et savons-bain qu'i' m'fit l'honneur de me d'mander m'n opinîon!
“Tch'est qu'tu en crait té, Caouain?” qu'i' m'dit.
“Ah dame, par exemple!” je li raîponni, “je n'y connais rain mé. Je n'sis pas fermi et je n'fais même pas partie du clergé, ch'est pourtchi, tch'est qu'ou voulez que j'vos en diche?”
“Eh bain, ch'est pas tout chenna, saute sus ma “bike” et va-t-en interviewer Maît'e Cliément d'Caen et rapporte nous s'n opinion.”
J'étais bain content d'aller faithe une petite promenade à la campagne, mé, et je vos asseûthe que je ne me fit pas prier deux feis.
Je trouvi l'bouanhomme à grapiner ses patates et j'nos assiévîmes sus l'fossé à la foyéthe pour un “chat.”.
Je li fis les complîments du chef et je lis raconti chein qui v'nait de s'passer dans l's Etats.
“Eh v'là oquo une autre beveûthe!” qu'i' s'ecriyi, “quand tchi qu'nos Messieux apprendront d'l'avis, don? Fallait pitchi tout chenna d'côté! Continuer à louer des fermes qui n'peuvent pas lus payi, et emplier des Professeurs d'Astronomie et je n'sais tchi, avec toutes les lettres de l'alphabet drièthe lus nom, pour venin ichin êprouver à nos apprendre à craître des patates!
Si l's Etats veulent nos aidgi, ch'n'est pas par enseigni à lus grand-méthe comment supper d's oeus!
Qu'i' faichent tchiquechose d'utile! Qu'i' passent des réglyements pour empêchi les marchands de sus l'weighbridge de lus enrichi à nos dêpens!
Qu'i' tâchent de contraindre les Compagnies des Steam à transporter notre marchandise à des prix d'raison!
Qu'ils envient une Députation à Londres, explitchi au Gouvernement Angliais qu'il est à nos ruiner par encouothagi des bitche d'Espagnos et des maudits Hollandais à dêchergi toutes lus salopethies sus les marshiers!
S'i' faisaient autchune chose comme chenna, nous y comprendrait oquo tchiquechose, et nou lus en saithait gré. Mais nos montrer comment labouother nos terres? Oh, la, la!
Et tu m'dis té Caouain qu'un membre a dit que les fermiers ne visitent pas la ferme? Eh bain chenna n'est pas vrai. Je y ai té mé-même sapresti! Y a tchiques années quand j'eûmes la Visite Royale par siez-nous. J'étais iun des “voyeurs” mé et j'eûmes not'e dîner siez Fraînque Salou. Opprès dîner je crouaîsimes la route pour aller vaie la ferme et en passant à travers de iun des clios je m'aperchu qu'i' y avait de l'herbe à mille noeuds aussi êpais comme de pé sus un cat.
L'Expert Scientifique était à côté d'mé, et j'lis dis comme chenna, “Tch'est qu'chenna veurt dithe? Je pensais avé ouï votre prédécesseur dithe à iune de ses conférences que nou pouvait dêtruithe chenna avec de la caux.”
“Vaithe,” qu'i' m'dit, “ch'est là la théorie, et je y en avons pourtant mins une bouanne couoche.”
“Eh bain,” j'li dis, “ou pathaît faithe bain d'sus, tréjous.”
I' hauchi l's êpaules et dit “Vaithe dja!”
Maît'e Cliem continuit pour pus d'vingt minutes à m'donner des exemplyes dans sa longue expérience qui prouvaient que la pratique valait bain mus que toutes ches théories scientifiques là. I' m'pâli des récoltes ênormes de patates, de fain, d'avaine et d'froment qu'il avait cru dans des années, longtemps d'vant qu'nou ouïsse pâler de Professeurs Ecossais ou d'Experts Scientifiques.
I'n'faut pas craithe que Mess de Caen dêlivri une si longue harangue tout d'une haleine comme je vains de l'êcrithe ichin.
De temps en temps il en halait une lache par le goulet de la jougue à cidre, pour se rafraîchi l'gôsi, chein qui m'fit penser au Juge Aubin dans l's Etats.
En disant “A bétôt,” à Maît'e Cliém i' m'vint justement une idée.
“V'là une belle opportunité pour vous, Mess de Caen,” j'li dis, “ou c'menchiz à prendre d'l'âge et probablyement qu'ous allez vos r'tither iun d'ches jours. Acheteu que l'Comité cherche une autre ferme, pourtchi pas lus louer la vôtre? Les Etats sont d'bouans payeurs, ou savez.”
“Ah, du bidaimme, don!” i' s'êcriyi: “Chute feis là!”
“Si je n'pouvais pas travaillyi ma ferme mé-même, j'aimethais mus la laissi paître ès coucous que d'la vaie saccagie par un êtrangi avec ses expériments. Crais-tu que j'veur vaie ma terre empouaîsonée avec toutes sortes d'ingrédients et hallée jusqu'à la mouelle avec du maudit “nitre”? Nennin, par exemplye!”
Je ne r'dis rain. J'avais êprouvé à suggérer un bouan locataithe pour le bouonhomme, mais i' n'en voulait rain.
Le Comité d'Education peut trouver une autre ferme s'i' veurt, mais bain seux qu'i' n'aitha jamais la sienne à Maît'e Cliément d'Caen.
Caouain
1924
Viyiz étout: