Le Caouain eut l'honneur d'assister i'y a tchiques semaines, à la conférence de Moussieu Attenborough sur la maladie des patates et des tomates.
Che fu tune sethée bain intérêssante, chu moussieu-là faisant preuve d'une connaissance ermerquablye de la chose en tchestion et d'un dévouement admithablye pour le bain-être des fermiers jerriais.
Dans l'couothant d'la distchussion qui s'ensuîvit, la théorie du “sprayage” obligatouaithe fut mise en avant et la plupart des fermiers et marchands qu'étaient présents étaient d'opinion que ch'tait là le seul moyen de combattre chu fléau-là qui m'niche d'être la ruine de Jêrri.
Parmi les assistants je r'mertchi Maîte Cliément d'Caen qui pathaîsait prendre un grand intéthêt dans tout ch'qui s'passait. I' n'print autchune part dans les débats, car comme bain d'autres, i' n'est pas grande sorte d'orateur en public.
Mais je m'fis un d'vé d'aller siez-li tchiques jours opprès li d'mander tch'est qu'était s'n opinion de tout chenna.
“Caouain,” qu'i' m'dit, i' n'y a pas d'doute que l'Sieur Attenborough est un cléveur homme et i'y avait bain d'la véthité dans tout chein qu'i' nos dit l'aute' sé.
I'y a du bouan dans ses théories si seulement qu'nou pouvait les mettre en pratique d'une manièthe compliète.
Prenons d'abord sa r'quémandation de brûler les vignes.
L'idée n'est pas nouvelle. Je faisons chenna du temps d'man grandpèthe, quand nou pouvait.
Car nou n'peut pas l'faithe touos l's ans, i'faut du temps bain sec duthant l'dêfouissage pour faithe chenna.
Et par le temps que les vignes sont en êtat d'brûler, i' n'reste, pour bain en dithe, que l'rôton, la pus grand' parties des fielles lus sont dêtachies et lus sont trouvées pillonnées dans la terre.
Ah ça, Moussieu Attenborough nouos dit dans l'couothant d'san discours, que châque fielle contenait des millions de germes de maladie. Alors il est bain êvident que malgré toute la brûl'lie que nou pouorrait faithe il en restethait assez dans un seul clios pour empouaîsonner tout un continent.
Quant à la suggestion de certains messieux que l's Etats dev'thaient passer une louai contraignant touos les fermiers à sprayer lus récoltes, je n'crai pas pour un moment que nous piaîsse mettre chenna en pratique.
Tchi garantie que nous aithai que la chose était faite comme i' faut quant au nombre de sprayages et la forche de l'application?
I' faudrait don appointer un Inspecteur spécial pour châque douzaine de fermes, et ches gars-là bain seux s'attendraient à d'hauts salaithes et à une pension au but de djaix années d'services.
A mains que la chose ne pouorrait fonctionner par un espèce de système honorifique.
Dans chu cas-là i' faudrait installer une ênorme “spray tub” dans l'Parish Hall de châque pâraisses souos la présidence du Recteur, car les pouores Connaîtablyes en ont dêjà bain trop à faithe et les membres de la police pouorraient aller lus asseuther que l'travas fusse fait comme-i'-faut.
Un autre moyen es'sait de laissi la chose sus la responsabilité du fermi li-même et infligi une forte amende sus touos les siens qu'éthaient le moindre signe de maladie dans lus patates.
Mais j'ai grand peux que chu système-là caus'sait bain des complications et des procès à n'en pus fini.
Nennon Caouain, le fermi jerriais est un anima que nou n'peut pas cachi comme nou veurt. Nou n'peut pas l'persuader à faithe autchune chose pour le bain-être de la communauté. I' n'se dêran'gea pas à mains que che sait directement pour s'n'intethêt personnel, ch'est en tchi le seul moyen de l'faithe sprayer ses patates est d'exciter sa jalousie.
Tch'est qu'ou voulez dithe par chenna, Maît'e Cliém? je li d'mandi.
Eh bain Caouain ch'est comme chennechin. Tout ch'qu'i' y a à faithe, si le système du sprayage est êfficace, est de d'mander à deustrais des pus êcliaithis dans châque pâraisse de sprayer lus patates comme i' faut et quand lus vaisins verront qu'i' n'ont pas d'maladie, et conséquemment le doublye d'la récolte de patates saines, la jalousie, que j'ai mentionné tout-à-l'heuthe et qui n'fait pas défaut siez l'fermi jêrriais, les pousse à sprayer éttou, avec le rêsultat que dans un an ou deux le sprayage déveindra universel sans que la louai s'en mêle ou qu'nous impose un système obligatouaithe.
Ch'est un mot ch'tis là que les Jerriais n'aiment pas.
Je n'sais pas tch'est qu'ous en pensez, mes chiers lecteurs mais je crai mé que l'idée du bouanhomme de Caen n'est pas bain mauvaise.
Caouain
1924
Viyiz étout: