J'ai ouï, chute semaine, une bain drôle d'histouaithe :
Oh si ch'est qu'oulle est vraie, je me d'mande, tch'est qu'j'allons dévenin?
I' pathaît que l'aut'e jour, un jeune homme, le fils d'un commerçant bain connu, était à l'école comme d'habitude, dans iun de grands établissements scolastiques de l'île. Quand il avait sorti de siez-li l'matin, sa memmée li avait donné une commission à faithe dans la ville, et li avait confié l'argent nécessaithe pour payi pour chein qu'i' d'vait rapporter.
Duthant la classe il eut occasion de haller san mouochet de sa pouchette et, ch'la faisant, il eut l'malheur d'en sorti deuxtrais chelins qui roulithent sus l'plianchais. Les êlêves d'à côté d'li s'empressithent de les r'lever pour les y r'donner mais l'maître en cherge d'la classe les avait ouïs tchaie èttou, li, et à chein que nou m'dit, s'en fut tout dret au jeune homme et li ordonni de li donner immédiatement touos les sous qu'il avait sus li.
Ah ça, je me d'mande, mé, tch'est qui pouvait être san motif?
Est-che que les professeurs dans ch't êtablissement-là ne sont pas suffisamment rétribués pour lus services, et qu'i' craient qu'ils ont drouait à autchune piéche d'argent qu'adonne à tchaie sus l'plianchais duthant la classe?
Ou bain est-che que j'sommes à abriter, sans l'saver, un d'cendant du fameux Dick Turpin, dans iune de nos institutions publiques?
V'là qu'en aithait assez la mîne!
Enfin tréjous, le jeune homme, naturellement, erfusi de s'laissi dêvaliser d'même et dit au maître qu'i' voulait saver par tchi drouait qu'i' pouvait li enlever ses sous comme chenna.
L'affaithe fut rapportée au principa, le garçon se pliaigni à ses pathents quant i'r'vint siez-li et r'fusi d'aller à l'êcole le lendemain.
Au moment d'êcrithe je n'sais pas si ch'est qu'i'y a ieu d'autres dêveloppements mais i' m'semblye que dans d'patheilles conditions, les siens d'entre vous qu'ont des êfants qui vont à l'êcole f'thaient bain de s'asseuther qu'i' n'portent autchunes valeurs sus ieux de peux qu'i' n'les laissent rouler sus l'plianchais en dêhallant lus mouochet.
Caouain
1924
Viyiz étout: