Les Pages Jèrriaises

L'Assembliée d'Jèrriais

Rêunion mensuelle, Mar 1972

L'Assembliée d'Jèrriais La rêunion mensuelle eut lieu jeudi 1'23 d'mars dans la Salle Publyique dé St. Martin, eune séthée ouvèrte à tous, et à bein près chent membres lus y rêunîtent.

Lé rapport du jeu d'carte fut liu et accepté.

Le restant d'la séthée continnuit sans arrêt, auprès qu'lè Président avait annoncé lé programme.

Y'eut des r'citâtions par les Dlles. Audrey Le Feuvre et Ruth Le Feuvre et John B. Germain. Auprès des discours improptus par lé Connêtabl'ye R. H. Le Cornu, l'Sieur C. P. Billot, l'Sieur G. J. Perchard et l'Député W. Tomes, suivies par des chansons - “J'ai pèrdu ma femme” et “Auprès de ma blonde”. Y'eut un intervalle et lé Président fit l's annonces

Es Ecréhos

L'Sieur G. J. Perchard dit qué lé Conmité Dramatique avaient espéthance d'aller ès Êcréhos pour les divèrtiss'ments du mais d'juillet, et lé Conmité es'sait bein content d'saver combein d'membres en étaient întérêssis.

Y'eut eune collecte dé prînse en faveur des “Jersey Home Helps”.

La deuxième partie c'menchit auvec eune récitâtion par la Dlle. Audrey Le Feuvre. Et pis des dialogues impromptus par lé Sieur C. P. Billot et Mde. M. Maillard, lé Sieur R. H. Le Cornu et l'Sieur G. J. Perchard, lé Sénateu P. J. Romeril et l'Député W. Tomes, et les Dlles. Audrey Le Feuvre et Ruth Amy. Les sujets avaient ‘té chouaîsis par la Dlle. F. Hacquoil et l'Sieur F. Le Maistre.

Pièche de théâtre

Auprés, ch'fut la pièche dé théâtre montrée à l' “Eisteddfod” - “À grands maux grands r'mièdes”, par A.L.P. Mde. de Sauville (Mde. I. Pallot), Robert, san fis (J. N. Richard), Catrinne, sa nièche (Audrey Le Feuvre), Jeanne, la servante (Ruth Amy), Thomas, le domestique (B. J. Amy) et Richard de Veulle (John B. Germain). La scène - eune appartément dans lé mangni ès de Sauville; quand les ridgeaux ouvrent, Catrinne est toute seule.

La séthée finni auvec des chansons, “Jean, gros Jean” et “Au clair de la lune”, la Dlle. H. de Veulle étant au piano.

Lé Président fit les r'mèrcîments et “La Reine” fut chanté.

1972
 

Viyiz étout:

 

 

Les Pages Jèrriaises