L'ÉQUEURÉ.

Pourqu'i donc tient-on tant à chutt' pouôr' vie?
Pourqu'i tant frémi à l'idais d'la mort?
Vivr'? 'las! n'êch' pas qu'eun' cruelle agonie?
Mouori? que s'n aller là ouesq' bein nou' dort?

Sus qu'i, en effet, peux-j' compter? Qui' joie,
J' vo's d'mand' - pour eun' seule heur' s'ra toute à mé?
La Vie? Ah! n'êch' pas un queur ov eun' pliaie
Pour qui n'ya qu'un Docteu.... et li - l'Tombé!

Je quille eun' flieur - et vit' la v'là fânée -
Un orage écliat' coumm' je r'gard' le ciel -
Je travaille, et m'n espérance est enl'vée -
Je sèm' de l'amour - et j'nerquill' que fiel.

Ho!..... 'ouesq' n'ya qu'eun' chos' seur' - chla, la Souffrance,
Et, - après, - un long, éternel soummé, -
J'aspir' pour le moment d'la délivrance
Et quitt'rai l'mond' sans un régret.

LE TRÉJOUS-PLIU.

O Natur'! grande et bell'! travas du Sien
Qu'a tout créai, - sais mill', mill' fais bénie!
Et piess'-t'i Li pliair', qu'a tout fait si bein,
Pour joui de té no's accorder long' vie.

Chachun d'nos jours, je l'sais bein, a son nuage,
Mais, passé, n'rend-i pas la vie pus belle?
Et lié-mêm' - qu'est qu'oulle est, qu'apprentissage
Pour ieun' pus glorieuse ouesq'ou' se r'nouvelle?

Solé erbrille après s'être obschurchi -
Larv' veint papillon - et jeun' fill' siet mère -
Grand quên' n'était hier que p'tit glian enfoui -
Flieur ne meurt pas sans pépinier la terre.

Terre ou Tombé alors - pour mé mêm' chose -
Sus Terre, Espoir, - Aut' vie, c'min par Trépas:
Vie 'ya tréjous, que corps meuve ou s'erpose, -
Tréjous, donc,' j' jouis, - heureux dans aucun cas.

L.