Les Pages Jèrriaises

Ch'est la fin qui couronne l'oeuvre


Les patates sont à quatr' chelins.
Les vannèes rouolent sus touos les qu'mins,
Et nou rapporte des hèrpins;
Allons, garçons, ch'la va!

Chaque perque en a chinq, siès cabots,
Eche êtonnant si, dans les clios,
Les gliainneurs chantent coumme des oiseaux?
Allons, garçons, ch'la va!

Les fermièrs ont cigare au bé
Les fermièthes comptent les sous au ser,
Les hardelles pensent à se s'palmer;
Allons, garçons, ch'la va!

Mess Bisson, drièthe san compteux,
Se frotte les mains d'un air joyeux;
Ses vièrs comptes s'sont payis, bein seux!
Allons, garçons, ch'la va!!

Elie
1912

 

Viyiz étout:

 

Les Pages Jèrriaises