|
La viel' Nenné! la viel' Nenné! Mondoue, mondoue, comme oulle allait, Coum' s'oulle avait 'taï érataïe; Et ch'est qu'ou'n'perdait pon son temps, Jamais ou n'allait faneanant, Que ch'fuss' matin ou arlevaïe. Sa servante, la viel' Merdgitte, Allait aitout toute aussi vite, Car oulle était ditaï coum' lli: Trejous trimouss', trejous rêmue; Jusqu'à chein que la niet fut v'nue Ou' n'r'posait ni cliosait l'yi. Merdgitte ov' la première v'nue N'faisait pon d'fliannai dans les rues; Et si sa maîtresse l'enviait Pour fair' pour lli tchique message, Comme une fille posaïe, sage, Tout d'un coup Merdgitt' r'venait. Chétait un' femme de travas Tchi travaillait à flieur de bras, Un' véritablle ménagière; Depis le matin jusqu'au sei Ou n'cessait pon de son tiné: Vraiment coum' lli nou n'en veit dguère. Sans cess', sans cesse, ou tracachait, Et netissait et ramassait, Faisant la dguerre es airagnies, Tch'i's n'savaient pus ou-est-qu-se coulai; Et mêm' les pouor's pêtres, je crai, N'étaient pon par lli épaîgnies. S'ou' les viyait, ou' pilait d'sus, Fût-che à la f'nètre ou drièth' l'hus, Oulle était seur' de les pascrire; Et si jamais y-en écappait, Cheinqu' chutte bête là dev'nait, Devrai, je n'peux pon vos le dire. Le cat tch'érait 'taï sus sa tchaire, Tch'érait mertchi ses pas sus l'aire, Erait t'aï bein seux de scodai; Car ou baillait bein vit' la chasse Ov' bringe ou g'nêt à toute la race De cats ou tcheans tch'osaient entrai. Nou dit qu'les cats filent d'la treme; La viel' Nenné en faisait d'même, Car oulle avait accouoe son rouet; Quand v'nait la fin de la seraïe, Et que sa cauche était ouvraïe, Ou faisait ch'la pour s'délassai. Qu'nou-s-all' partout ou-est qu'nou voudra; Allaïz douoch'ment, allaïz bein vite: Nou n'verra pon chein qu'nou-s-a veu; Ous n'trouv'raïz pon bein d'gens ach'teu Coum' not' Nenné et sa Merdgitte. |
Viyiz étout: