J'pouvons aimer d'pis qu'i' nos aimit l'preunmyi.
Mes chièrs anmîns, né criyiz pon un châtchun tchi dit qu'il a l'esprit, mais êprouvez-lé si l'esprit qu'il a veint du Bouôn Dgieu. Ch'est en tchi y'en a un tas d'faux prophètes tchi lus sont dêhalés dans l'monde. Ou pouôrrez r'connaître l'esprit du Bouôn Dgieu coumme chennechîn: châque esprit tchi dêcliathe qué Jésû-Chri est v'nu dans la chai est du Bouôn Dgieu, mais châque esprit tchi n'dêcliaithe pon qu'Jésû est humain n'est pon du Bouôn Dgieu. Chennechîn est l'esprit d'l'antichrist qu'ous avez ouï est pouor v'nîn. Ch't esprit est dêjà dans l'monde.
Ous êtes, vous, mes chièrs êfants, du Bouôn Dgieu. Ous avez triomphé sus ieux, par cause qué l'chein tch'est d'dans vous est pus grand qu'lé chein tch'est dans l'monde. Ieux, i' sont du monde et coumme dé raîson dithent chein qu'lé monde dit et l'monde les êcoute. J'sommes du Bouôn dgieu, nous, et autchun tchi connaît l'Bouôn Dgieu nos êcoute; mais autchun tchi n'est pon du Bouôn Dgieu n'nos êcoute pon. Et né v'là coumme tchi qu'j'èrconnaîssons l'esprit d'la véthité et l'esprit d'la menn'tie.
Mes chièrs anmîns, entr'-aimons-nous ch'est en tchi l'amour veint du Bouôn Dgieu. Touos les cheins tch'aiment ont 'té nés du Bouôn Dgieu et connaîssent lé Bouôn Dgieu. Touos les cheins tchi n'aiment pon n'connaîssent pon l'Bouôn Dgieu. Né v'chîn coumme tchi qu'lé Bouôn Dgieu nos montrit s'n amour parmi nous: il envyit san seul Fis unnique dans l'monde à seule fîn qué j'piêssons vivre lé travèrs dé li. Ch'est chennechîn l'amour: pon qu'j'aimêmes lé Bouôn Dgieu, mais i' nos aimait et nos envyit san Fis coumme un sacrifice tchi nos hal'la nos péchés. Mes chièrs anmîns, viyant qu'lé Bouôn Dgieu nos a tant aimé, j'dévthêmes étout nos entr'-aimer. Fis d'âme n'a janmais veu l'Bouôn Dgieu; mais si j'nos entr'-aimons, l'Bouôn Dgieu vit en nous et s'n amour est fait entchi en nous.
Né v'chîn coumme tchi qué j'savons qué j'vivons en li et qu'i' vit en nous: i' nos a bailli d'sén esprit, et j'avons veu et têmouongnons qu'lé Péthe a envyé san Fis pouor êt' lé Saûveux du monde. Si autchun r'connaît qu'Jésû est l'Fis du Bouôn Dgieu, l'Bouôn Dgieu vit dans ch'tî-chîn et ch'tî-chîn dans l'Bouôn Dgieu. Et d'même jé connaîssons et nos fions à l'amour qué l'Bouôn Dgieu a pouor nous.
L'Bouôn Dgieu est l'amour. Lé chein tchi vit dans l'amour vit dans l'Bouôn Dgieu, et l'Bouôn Dgieu dans li. Ch'est coumme chennechîn qu'l'amour est grée entchi parmi nous à seule fîn qu'j'ayons confianche au jour d'la jug'gie: dans chu monde-chîn j'sommes coumme Jésû. N'y'a pon d'peux dans l'amour. Mais l'amour tch'est parfait cache la peux, par cause qu'la peux est d'la peunnition. Lé chein tch'a peux n'est pon grée parfait en amour.
J'aimons viyant qu'i' nos a aimé l'preunmyi. Lé chein tchi dit qu'il aime lé Bouôn Dgieu mais tchi déteste un fidèle est un menteux. Ch'est en tchi l'chein tchi n'aime pon un fidèle qu'il a veu, n'peut nément aimer l'Bouôn Dgieu qu'i' n'a pon veu. I' nos a c'mandé ainchîn: autchun tch'aime lé Bouôn Dgieu dait étout aimer l's aut' fidèles.
Viyiz étout: