Chein qué j'vos racontons, ch'est tout chein qu'j'avons ouï et tout chein qu'j'avons veu entouor la Pathole d'la vie, tch'est chein tchi 'tait au c'menchement, chein qu'j'avons r'gardé et qu'j'avons touchi - ch'est en tchi la vie nos a appathu, et j'l'avons veu et j'sommes à en têmouongni et à vos raconter entouor ch't' êtèrnelle vie tchi 'tait siez l'Péthe et qu'j'avons veu.
J'sommes eunis auve lé Péthe et auve san Fis Jésû-Chri, et né v'là pouortchi qué j'vos êcrivons pouor vos raconter tout chein qu'j'avons veu et tout chein qu'j'avons ouï à seule fîn qu'ou séyiz eunis auve nous, car j'en s'sons don acouo pus rêjouis.
Né v'chîn la pathole tch'i' nos donnit et qué j'vos donnons - ch'est en tchi l'Bouôn Dgieu est la lueu et i' n'y'a pon d'nièrcheu en li.
Si j'dithons qué j'sommes eunis à li, mais si j'sommes acouo à marchi dans la nièrcheu, chein qué j'dithons est des menneties et chein qué j'faîthons n'est pon la véthité.
Mais si j'marchons dans la lueu, comme li il est dans la lueu, j'sommes touos eunis et l'sang d'Jésû san Fis nos nettit dé touos nos péchés.
Si j'dithons qué j'n'avons pon d'péché, j'sommes des mensongièrs et i' n'y'a pon d'véthité en nous.
Si j'dithons franchement qué j'avons fait du ma, il est juste et tcheint à sa pathole et nos pardonne nos péchés et nos nettit dé tout ma.
Si j'dithons qué j'n'avons pon d'péché, jé l'trahissons et sa pathole n'est pon en nous.
Mes chièrs êfants, j'vos êcris tout chennechîn à seule fîn qu'ou séyiz sans péché. Et si autchun houmme est un pécheux, j'avons un anmîn et eune aîgue siez l'Péthe tch'est Jésû-Chri, l'juste.
Il est l'sacrifice pouor nos péchés, mais pas sèl'ment pouor les nôt's, mais pouor les cheins d'tout l'monde.
Viyiz étout: