Un Jèrriais transplianté

Lé 6 d'dézembre, 1985.

Chièr Moussieu l'Rédacteu,

Dans nouot' preunmié lettre à vous j'mentionnînmes nouot' bouôn vièr anmîn, lé défunt Maît' George Francis Lé Feuvre. Souvent, ch'tait li tchi pâlait entouor ses fréthès, dé tchi qu'i' 'tait hardi en peine. Iun d'ieux 'tait Sidney George, né à St Ouën mais qu'en 1901, à l'âge dé hui tans et d'mi, êmigrit auve ses pathents au Cannada, emm'nant étout un fréthe, John Giffard (Jack), tchi n'avait qu' dgiêx-huit mais dans l'temps. Laîssis driéthe auve Papa et Manman L'Feuvre étaient les deux autres fréthes nés en Jèrri, George et Frank.

Sidney George mouothit en Ottawa, au Cannada, lé 28 d'août, 1978, ayant finni d'êcrithe un accompte d'sa vie dans les trais ans d'vant. J'avons pensé qué l'histouaithe dé ses p'tits jours en Jèrri întérêss'sait vos lecteurs, ch'est en tchi, auve la pèrmission d'sa fanmil'ye, j'allons donner tchiques extraits dé “La vie et l's amours d'un Jèrriais transplianté.”

Dans l'avant-propos ses êfants survivants êcrivîdrent:-

“P'pèe s'était pûtôt êdutchi li-même, car i' y'avait bein p'tit d'monde dé s'n epoque tch'avaient la chance d'aller à un unnivèrsité, ou même quant à ch'la dé compliéter lus êducâtion à eune êcole s'gondaithe. Tèrribliément louoya, sentimental et compliaîsant, P'pèe avait d'forts principes, i' tait têtu et il avait raide bouonne mémouaithe. Un rouoyaliste dé travers, il avait conscience dé rang et d'l'ordre etablyi.

“Duthant ses quatre-vîngt-chîn-s ans la vie a P'pèe fut dominnee par trais louoyautés, ch'est à dithe san patrimoine Jèrriais Britannique, sa fanmil'ye, s'n églyise … Dans chutte autobiographie … i' fournit pour postérité d'fanmil'ye pas seulement eune connexion importante auve ses réchinnes mais un souv'nîn pèrmanent d'eune pèrsonne profondement sentimentale et aimabl'ye, un homme dé fouai entêtee et d'tout pliein bouanne volante envèrs tout l'monde.

“Nous, ses êfants, j'mantchons nos gens, tchi mouothîtent touos les deux en 1978, mais j'sommes èrconnaîssants d'aver ches chroniques si pénibliément tapées par P'pèe sus sa machinne à êcrithe duthant les deux ou trais dreines années d'sa vie. Duthant la pus grand' partie d'chu temps-là il enduthit des souffrances et i' souongnit sa femme învalide du mus tch'i' pûsse.

Auve chu portrait d'un bouôn Jèrriais, péthe dêvoué et craignant l'Bouôn Dgieu, j'allons continnuer auve un r'cit d'sa jannesse dans l'Île. Sidney George Lé Feuvre êcrivit:-

“Man preunmié souv'nîn fut quand, à l'âge d'entre deux et trais ans, habilyi dans un p'tit fro, étant un mio janne pour des braies, mes pathents m'emm'nîdrent auve ieux pour aller dêfoui des lédgeunmes. J'c'menchis à plieuther pa'ce qu'i' marchaient trop vite pour mé, ch'est en tchi i' décidîdrent dé m'èrméner siez nous, tout en m'consolant sus lé c'mîn. Bieau qu'j'eússe lé tchoeu rompu, j'fus bein vite au liet et endormi.

“Nouot' maîson en pièrre, auve sa forge en driéthe (auve accès à la tchuîsinne), fut bâtie par Papa et P'pèe. Pa'ce qu'i' y'avait tant dé j'vaux dans chu temps-là, nos gens 'taient tréjous bein otchupés, et quand nou 'tait voulus, eune tape à la b'sante porte dé tchuîsinne portait tréjous réponse. Chutte maîson-chîn, lé lieu d'ma naîssance, 'tait dans la pâraisse dé St Ouën, dans l'ouest dé l'Île dé Jèrri, Îles Britanniques dé la Manche.

“Comme fanmil'ye y'avait Papa et Manman, P'pèe, M'mèe, mes fréthes George, Fraînque et mé. Papa dîthait tréjous la priéthe dévant les r'pas et nou n'ôsait pon c'menchi à mangi d'vant chutte cérémonie-là. J'm'èrsouveins dé ch'la et des priéthes à haute vouaix d'vant s'couochi. À chu moment-là j'c'menchis à mé r'souv'nîn d'choses pus cliaithement. I' n'fallait pon touchi rein tchi n'nouos appartenait pas, i' fallait tréjous dithe la véthité, être propre, et souongni d'nouos affaithes. J'soulais r'garder avec envie ès jouettes, violon, etc, à man grand fréthe George, mais j'n'éthais pas ôsé touchi chein tchi n'm'appartenait pas – bouonne disciplinne pour autchun êfant. Man p'tit fréthe Fraînque, tch'était acouo dans l'bèr dans chu temps-là, né nouos concèrnait pas du tout, George et mé.

“L'âtre mé pathaîssait énorme; j'pouvais marchi tout en d'dans et r'garder amont la cheunm'née sans qu' aver à m'baîssi. Papa, tchi r'sembliait à Jean Noué auve sa blianche moustache, avait eune mèrque horizontale sus san front. Par tchuthiôsité, j'êprouvis à la touchi un jour quand i' m'avait sus ses g'nouors. Tout douochement i' m'èrmîns la main bas et m'dis dé janmais n'y r'touchi ou d'n'en r'pâler. (Bein d's années auprès, j'dêcouvris qué ch'tait l'lis dé d'vant d'eune pérruque.)

J'mé pliaîsais hardi à r'garder l's activités à la forge, à vaie l's êtînchelles sorti des rouoges fièrs tch'étaient à être frappés sus l'enclieunme, les chabots des j'vaux à être féthés, etc.

“Quand j'avions entre quatre et chînq ans j'nos en feûnmes d'meuther auve Manman Giffard (la belle-méthe à M'mèe) dans la Vallée d'St Pièrre. Oulle 'tait toute seule et pon trop diguante – la raîson pour les nouvieaux arrangements. La Vallée d'St Pièrre 'tait pittoresque et j'tais heûtheux dans mes nouvieaux alentours, mais ch'tait un temps enn'yant pour George tch'avait resté auve Papa L'Feuvre à St Ouën. Fraînque 'tait acti par à ch't heu et întérêssi dé ch' tchi s'pâssait. À bein près dans chu temps-là jé m'rappelle d'aver fait tchique chose d'âffreux. Touos les jours, Manman soulait fitchi sa biche à paître. Ou r'vénait au trot auve la biche halant dû et j'mé d'mandis tch'est tchi'i' s'arriv'thait si j'donnais l'gambet à Manman en pâssant, et autant j'en fis. Manman s'êtravelit pêsamment et ou fut mauvaisement sécouée. V'là tchi m'fit hardi d'peine et M'mèe c'menchit à m'talmoûser en as-tu en veurs-tu. Bieau qu' Manman fûsse acouo jobelinnante, ou s'èrbutit dêliêment pour mé protégi dé M'mèe, explyitchant qué j'tais trop janne pour réaliser chein qu' j'avais fait. J'eus des r'mords d'aver 'té si méchant et j'prannais tréjous garde dé n'èr-faithe janmais d'peine à ma chiéthe Manman tchi j'aimais si bein.

Lé 22 d'févri, 1986.

Chièr Moussieu l'Rédacteu,

Dans l'preunmié extrait dé “La vie et l's amours d'un Jèrriais transplianté”, un accompte dé la vie du défunt Maît' Sidney George Lé Feuvre, iun des p'tits fréthes à “George d'la Forge”, i' dit comment tchi'i' r'muit d'St Ouën pour aller d'meuther auve Manman Giffard dans La Vallée d'St Pièrre et comment qu'eune fais, en jouardant, i' lî donnit l'gambet quand ou s'en r'vénait à la maîson auve sa biche. I' continue: -

“J'allais à l'Églyise dé Ste. Mathie, tch'était pus près d'siez nous qu'la cheinne dé St. Pièrre, où'est qué j'gângnis l'preunmié prix à l'êcole du dînmanche en 1899. Lé Révérend Gruchy 'tait Recteu là dans l'temps”. (La mémouaithe au Sieur Lé Feuvre a p't-être failli ichîn, car lé Révérend d'Gruchy, lé péthe au Mâjeur F. A. L. dé Gruchy, eune fais Député d'St. Ouën, 'tait Recteu d'St. Pièrre.) “Pour un p'tit d'temps j'prîns des léçons dans une maîson privée tout près d'Ste Mathie. Un jour, en r'vénant siez nous, j'tchis sus eune vêpriéthe; les êssaims et la bourdonn'nie mé remplyîtent dé tchuthiôsité. En examinnant par fourgonner auve un bâton, les êssaims m'attatchîtent et, sans doute, j'couothis siez nous heurlant, auve bein des pitcheûthes et grand ma. M'mèe mé frottit partout l'corps auve du bliu. Mes habits m'avaient sauvé dé ch' tch'éthait peut être eune position séthieuse. (J'n'ai janmais r'pété chutte foutaise-là.)

“À l'âge dé chînq ans nou m'env'yit à eune êcole catholique tch'était tout près et où'es tchi'i' y'avait, naturellement tout pliein d'enseignement r'ligieuse. Ieune des léçons montrait un dessîn d'un pécheux mouothant, et l'Dgiâbl'ye auve des cornes, eune coue, etc. traînant l'pécheux auve li, en'veloppé dans un lîncheu. Les nonnes nos dîthaient qué si j'n'étions pas bouôns Catholiques, ch'tait ch'la tchi nouos arriv'thait. Ch'la m'êpouvantais et j'en eu des ponserêsses. Quand mes pathents dêcouvrîtent la raîson pour mén êffrite i' m'èrtithîtent dé ch't' êcole-là. J'avais 'té là pour à bein près d'siez mais.

“À ch't heu j'tais grand assez pour marchi pus liain à l'Êcole dé l'Églyise dé St. Pièrre. J'tais content à ch't heu d'être dans ma propre êcole pârouaîssiale mais abasourdi par la rigueur d'la disciplinne. (Nou 'tait rêcompensés pour du bouôn travas, mais cèrtains d'être peunnis pour la moindre violâtion des règl'yes.) Ma preunmié frandgie 'tait quand jé m'grattis l'nez quand j'tions en lîngne auprès qué l'maître avait donné l'ordre 'Ne bouogiz pas!'. J'bouogis, et d'même j'avais d'sobéi, et bieau qué j'n'eûsse qué chînq ans et d'mi, jé r'chus la badgette pour la preunmié fais.

“Duthant ch't' êpoque la Dgèrre des Boèrs êcliatit. Les soudards dé la Reine, auve lus rouoges câsaques, lus armes et lus musiques, m'êmèrvilyaient, mé remplyissant d'jouaie toutes les fais qué j'les viyais.

“La bicyclette à P'pèe ('penny farthing', auve eune grand' reue en d'vant et eune pétite rouelle en driéthe) m'attithait. Eune séthée, en d'valant un mont rapide à la niet, i' heurtit eune pièrre et i' s'trébutchit pésamment. Èrlatant sa tchbulbute à M'mèe (qué j'êcoutais dé driéthe eune tchaise pa'ce qué sa fache et ses mains 'taient êgrînfliées et sangnantes, et sa rage auve la bicyclette et la sâcree pièrre pour aver 'té à la vaie 'tait au d'la d'description), i' n'y'avait pas d'doute tch'il avait tchée assez pésamment.

“M'n înstruction r'ligieuse, siez nous et à l'églyise, faîthait du progrès. J'apprîns qu'les bouôns allaient au ciel, pour vivre en jouaie êtèrnellement auve notre Sauveur auprès aver pâsser l'pas. Les mêchants 'taient j'tés dans l'feu d'l'enfé à janmais. J'êprouvais tréjous d'être correct et dé m'comporter, même quand j'grandissais. J'd'mandais tréjous au Bouôn Dgieu, dans mes priéthes, qué duthant toute ma vie I' n'mé laîss'sait janmais être mauvais. J'crai qu'ches preunmié priéthes-là m'ont protégi bein des fais pus tard et l'travèrs dé bein des dangièrs.

“À un pique-nique des pâraisses (Ste. Mathie, St Pièrre et St. Ouën) j'tais auve Ste. Mathie. J'étions arrivés à l'empliaichement du pique-nique en vainnes. Man fréthe George, tch'était auve les St. Ouënais, m'souôrit en pâssant. J'c'menchions à nos entré-vaie, George et mé, et pour la preunmié fais j'vis des machinnes faites pour sé divèrti. Dépis qu' George et mé d'meuthaient à part, ch'fut tréjous un grand pliaîsi pour nous d'être ensembl'yes, même qué ch'n'fûsse à un pique-nique d'êcole du dînmanche. J'eus eune mangnifique journée.

“La vie dans La Vallée d'St Pièrre 'tait pliaîsante, en s'amusant parmi les pommièrs et les paithièrs. I' y'avait des vîsites dé George tchi, eune bordée qué j'm'èrsouveins, mé d'mandit dé t'nîn ieune des filles (tchi rêsistit vigouotheusement) tandis qu' i' l'embraichîsse! J'aimais bein vîsiter l'moulîn à flieu à Charlton tout près, auve sa grand' reue à ieau au côté du bâtisse. I' y'avait eune êcliuse par en driéthe tchi m'nait au haut d'la reue. L'ieau vèrsait un mio d'l'avant sus la reue, la faîthant touônner et fournissant l'pouver nécessaithe pour touônner la meule du moulîn, tchi d'même moulait l'fronment en flieu. Mess Charlton, un bouôn vièr corps auve eune barbe tchi grisait, mé faîthait tréjous la beinv'nue et m'pèrmettait dé r'garder l'moulîn en allant.

“D'l'autre bord dé la route jé m'pliaîthais à r'garder lé j'va à être cachi à l'entou du preinseu, eune auge cirtchulaithe en pièrre dé huit ou dgiex pids en travers et d'eune haûteu dé p't-êt' deux pids. Eune barre horizontale s'êtendait d'l'êtampêtre et s'avanchait l'travèrs d'eune grand' reue en pièrre, la meule, dans l'tou, tchi 'tait remplyie d'pommes. Lé j'va, lié au but d'la barre horizontale auprès du d'hors du tou, cachi l'tou d'l'auge, touônnant la meule continnuellement jusqu'à qu' tout l'jus sortîsse des pommes. Enfîn, l'jus fut fait sèrvi à faithe lé fanmeux cidre dé Jèrri, tch'était assez fort eune fais finni d'bouoilli. Chu preinseu-chîn 'tait à la belle et propre fèrme à Mess du Feu, où'est tch'i' y'avait étout un bieau troupe d'la fanmeuse vaque Jèrriaise”.