|
Lé lion a eune hardi grande crîngne, et quand i' r'tchîngne, i' fait des grîngnes. La girafe aveint ès êtailes sans aver à monter s'n êtchelle. L'autruche - un ouaîsé tchi n'vole pon, sénon assis dans un avion. Lé zèbre est rilyi d'haut en bas, et i' fait tréjous ril'ye dé gras. Lé fliamant sé d'bute sus raîque un pid et r'sembl'ye hardi à un rôsyi. Lé léopard n'change pon ses picots et bait acouo à tathe-larigot. La crocodile a un souôri, sustout quand ou s'en va t'mangi. Les mèrcats lus mâtent si'en cas y'a d'tchi à r'mèrtchi chîn' et là. Lé marmoûset craque d'sa longue coue et fait un tas d'mêché atout. Lé véthot à véthues s'vouautre dans l'pité; i' veurt s'embelli en faîthant d'ité. L'hippopotame, l'hippopotame fait deux fais tout chein qu'il entanme. Lé couochon d'tèrre mange des freunmions en les litchant par des millions. Lé tchîmpanzé est bein aufait et fait autcheune chose tchi lî pliaît. Lé rhinocéros té côn'na s'tu n'lî donne pon assez d'louga. L'êléphant est dé vrai l'pus grand dé toutes ches bêtes, et fait d'san tchian. Geraint Jennings |
Viyiz étout: