|
Ès neuches, la gâche fut copée en morcieaux; Les mathiés fîtent sèrvi pouor chutte tâche Un vièr sâbre Êcossais. Mais à Glasgow Nou n'vait pon d'itelle sâbréthie dé gâches. Ma couôsinne m'explyitchit qu'ch'est faîchonnabl'ye: Les sâbres, ès neuches, rempliaich'chont les coutchieaux. Nou-s'étha don eune mâsse d'ôtis à tabl'ye Pouor coper, à la mode, nos bouans fricots. Mé, j'mang'geais un j'va, véthe, la graie au co Sans aver à l'coper atout eune scie, Et pouor man dêjeûner j'n'aim'thais pon trop Faithe sèrvi eune hache pouor man pain rôti. À tchi enfîn qu'chennechîn s'en va nos m'ner? J'allons-t-i' chîs'ler nos oeufs fricachis? Faithe sèrvi un râseux pouor un pâté? Eune dgilliotinne pouor lé pouôrre podîn d'riz? Ès restaurants faut-i', pouor eune pihangne, Un marté-pitcheux et un grand hale-cliou? Mais nou n'fait pon dé teurs à la campangne: Nou stique eune baïonnette ès pais au fou! J'éthons-t-i' à slachi not' podîn d'Noué? Trîlyi nos sannouiches atout des chîsieaux? Machacrer les tonmates s'tchies au solé? Êt' prêts à bigorgi nos bourdélots? Assa, nou n'veurt pon trop d'couques dans l'armée À mêler les armes et la coutell'lie. À la dgèrre, nou n'os'sait janmais env'yer Les soudards armés pouor la pâtich'chie. Dé couôteunme, nou-s'aime bein mus les fûsis S'il est tchestchion d'env'yer les hoummes en dgèrre: L'enn'mîn est heutheux tch'a, l'avant à li, Un soudard auve eune tchulyi à dêssèrt! Geraint Jennings Août 2003 |
Viyiz étout: