Les Pages Jèrriaises

L'Annivèrsaithe d'la Reine

 

Ouaithe qu'ou fusse née lé 21 d'Avri 1926, jé cêlébrons l'Annivèrsaithe d'la Reine, not' Duc, un Sanm'di en Juîn châque année.

Ch'est la couôteunme en Jèrri qu'lé Lieut'nant-Gouvèrneux tcheint eune èrception - eune "lévée" - à la Maîson du Gouvèrneux (Government House) et învite les gens à y aller mèrtchi la fête.

La r'ception soulait aver lieu lé Sanm'di matîn d'l'Annivèrsaithe Officiel, mais y'a deux-trais années i' fut dêcidé d'changi la date et tcheindre la cêlébrâtion lé Vendrédi au sé à seule fîn qu'eune pus grande partie d'la populâtion saient libre pouor y participer.

L'Annivèrsaithe d'la Reine

Y'avait étout l'idée d'faithe l'évênement un mio pus înformel, et S'n Excellence abandonnit s'n unniforme et atchilyit les gens dans un fa ordinnaithe - mais i' sembl'ye qu'les gens aimaient bein vaie l'Èrprésentant d'la Reine, not' Duc, dans un unniforme pouor la journée spéciale.

Quand i' fait bé, les gens cirtchulent dans l'gardîn, mais s'i' fait mauvais, ch'est dans la maîson qu'la r'ception a lieu. Les gardîns d'la Maîson du Gouvèrneux sont supèrbes auve eune mangnifique veue sus Saint Hélyi vèrs la mé.

Y'a tchiques années, y'avait eune idée d'abattre la maîson à la pliaiche d'la r'pather, mais nou-s'a dêcidé d'garder la vielle maîson comme un monûment architecturel et historique.

L'Annivèrsaithe d'la Reine

Né v'chîn des portraits d'l'Annivèrsaithe d'la Reine à la Maîson du Gouvèrneux, Vendrédi lé 16 dé Juîn 2000.

Les vîsiteurs arrivîtent dans l'gardîn par eune p'tite tente. S'n Excellence lé Lieut'nant-Gouvèrneux, Messire lé Général Michael Wilkes, 'tait dans l'gardîn à atchilyi les vîsiteurs.

L'Annivèrsaithe d'la Reine

Dans la grande tente sus l'hèrbe, nou sèrvait du vîn pétillant, du blianc ou rouoge vîn ou du jus d'frit.

La Bande dé l'Île dé Jèrri (Band of the Island of Jersey) 'tait là pouor jouer la mûsique. Nou dît qu'i'y'avait dans les siêx chents pèrsonnes là pouor cêlébrer lé jour dé naîssance d'la Reine et vaie les musiciens et vaie les soudards.

La Jersey Caledonian Pipe Band - mûsique Êcossaise - 'tait là étout à jouer lus pouques à vent.

L'Annivèrsaithe d'la Reine

S'n Excellence proposit la santé d'la Reine, not' Duc, et pis ajouôtit qué ch't'année 'tait l'chent'naithe d'la Reine Méthe tchi dév'thait mèrtchi sa chentchième annivèrsaithe au mais d'Août 2000. Né v'chîn l'opporteunité dé proposé la santé d'la Reine Méthe étout. S'n Excellence dît qu'oulle avait vîsité Jèrri bétôt auprès la Libéthâtion en 1945 et deux-trais fais d'pis et qu'ou symbôlisait les lians entré Jèrri et la Couronne. Des gens tchi avaient ieu d's expéthiences duthant l'Otchupâtion avaient 'té spécialement învités pouor mèrtchi l'annivèrsaithe d'la Reine Méthe.

L'Annivèrsaithe d'la Reine

Lé solé lithait et i' faisait bein caud, mais ch'tait raide bein pliaisant d'pâler auve des gens, ouï la mûsique et vaie tout ch'qu'i'y'avait à vaie - les roses, les bouais et l'mât auve la couleu du Lieut'nant Gouvèrneux tchi fliottait sus l'gardîn. Sa couleu est la couleu Britannique auve l'êtchusson dé l'Île dans eune blianche cèrcl'ye au mitan. Il en fait sèrvi eune p'tite sus sa vaituthe officielle étout.

L'Annivèrsaithe d'la Reine

La séthée cont'nait un grand show auve les mûsiques et pis les soudards d'la "Company of Pikemen and Musketeers" dé Londres. Ch'est la Garde d'Honneu pouor lé Lord Mayor d'Londres. Lus unniformes sont du dgiêx-septième siècl'ye - et lus armes étout. I' pathadîtent et nos mouontrîtent tchiques manoeuvres militaithes - et lus fûsis donnîtent des coups d'feu tchi chotchîtent bein des gens!

L'Annivèrsaithe d'la Reine

S'n Excellence, dans san grand chapé auve les plieunmes, saluit les mûsiciens et soudards, et la bande jouit "Dgieu Sauve la Reine".

L'Annivèrsaithe d'la Reine

Avant d'finni, lé Lieut'nant Gouvèrneux annoncit les noms des cheins tch'avaient gângni d's honneurs ch't' année. L's honneurs sont données deux fais par an - au Jour dé l'An et l'Annivèrsaithe officiel d'la Reine. Ouaithe qué la fête ait lieu lé sé d'avant, S'n Excellence annoncit quand même les noms des Jèrriais et Jèrriaises tch'avaient 'té honorés à seule fîn qu'les gens piêssent les saver et féliciter lus compatriotes un mio à l'avanche. Y'en avait trais - et don nou tapit les mains.

 

 

Viyiz étout:

 

Les Pages Jèrriaises