Les Pages Jèrriaises

Lé Bouan Prînce Tchèrli



Les Jèrriais aiment tréjous atchilyi des vîsiteurs distîndgis et auprès la Reine, not' Duc, i' n'y'a pèrsonne d'pus distîndgi qué l'Prînce dé Galles. Quand j'mèrtchons l'huit-chentchième d'not' lian partitchulyi auve la Couronne, ch'est un pliaîsi d'vaie l'préchain Duc dé Nouormandie en Jèrri.

La Reine a vîsité la Grand' Tèrre ch't' année – y'en a tchi dithaient qu'ch'est malheu qu'ou n'avait pon r'cliâmé, tandi qu'oulle y 'tait, les tèrres qué l'Rouai Jean pèrdit en mil deux chent quat'! Mais lé Prînce Charles connaît bein la longue histouaithe dé Jèrri, ayant aîdgi auve la dêfouithie d'antitchités à La Cotte dé St. Brélade quand i' 'tait êtudgiant d'archéologie y'a pus d'trente ans en mil neu chent souaixante-huit.

Nou sait bein qu'lé Prînce est întérêssi dans l'agritchultuthe organnique, et i' dév'thait apprêcyi not' lait organnique dé Jèrri, mais ses idées sus l'architectuthe sont bein connues étout et nou n'saitha pon si les nouvieaux bâtisses du Quartchi du Hâvre et des nouvelles êcoles sont vraînment à san goût!

Et la technologie n'crapaûde pon, oulle avanche sept noeuds dans la bliâse, valet. Nou-s'est accouôteunmé à vaie l'dêcouvrément dé statues et d'obélisques et d'pièrres commémoratives, mais faut-i' un lîncheu holographique pouor dêvouailer un hologranme?


Geraint Jennings

(Lé Prînce Charles veint en Jèrri lé 22 d'Juîn 2004)

 

Viyiz étout:

 

Les Pages Jèrriaises