Les Pages Jèrriaises

Deustrés Brins d'Avis

Ebain, emmin P[ellier], aprête tes guichons,
Chest Jeudi qu'tu convis un flioquet d'bouans garçons,
Qui n'se contente'tons pas, pargui, d'un bourdelot:
I faudra qu'tu nos guéde atout un bouan fricot,
Nos rondi comme des cauche, nos empli comme des tigue,
Ou de ta grand carcasse jen bârion pas une figue;
Mais comme tuest bouan garçon, j'prendrai la libertet
De t'bailli deustrés brins d'avis sus l'sujet:
Tu néras qua avé un morcé d' beu dla halle,
D'l'état d'Louorains Machon, ou du chain d'Elie Falle;
I ter faoudra ettout un jigot d'Mouton,
Tu pouoras l'acaté du bouanhomme Denison;
Un bieaux couple d'poulets, qui n'aie pas pus d'un an,
Atout un morcé d'lard d'la trie contuite en ten.
Le paisson que tu as par la cou attrappet,
Fricache-le dans du beurre qui n'sait pas tro salet,
Mais comme il est chico, chnessa pas d'qui nos grets:
Tu tâchechas d'iajouoté un couple d'bieau mulets.
Et pour le sgond cour, 'faut des cannards rôtis,
Mais souogne que les tigots sais ben épinoquie!
Un lièvre ou un lapin, ou ofûche un picot,
Ove deux pâtés d'cadline, finiront l'fricot.
Quand au sujet du vin, je oquo à t'averti
Que chnessa pas d'la drogue qui faoudra nos bailli.
Sait-tu ben, chès qui lia sorte d'champagne,
Atout qui les Messieux se font rouogi la trouogne;
Du mousseux, non-mousseux, et des yers de perdrix,
Qui vos les fait cacté comme des pies dênichies
Du port, du madère, du clairete, du bourgouogne,
Et du bouan chase café, fait vnin à la campagne.
Va siez un marchand d'vin lie dire qui t'en apporte,
Et qui nâge pas manqui d'en envié d'toute les sortes;
Et pis dans la seraits, quan j'te verron braji,
Et qu'jesson touos enniaits d'avé tan bargouêchi,
Sus nos ch'vaouts ben trimaits, chacun êquerfouchi,
Snîra dans sa tanière, pate-à-coux, se couochi,
Mais d'vant que d'nos en allé,
Je m'en allez oublié,
Qui nos faoudra à soupé,
Et si tuest un bouan avé,
J'resteron oquo siez té.
Tu n'éras qua rêcaouffé
Touos les restans du dîné
Dans la castrolle de Néné;
Et pour mus nos regallé,
Justement d'vant noze nallé,
Tu nos r'feras apporté
Une tasse de bouan fort café.
Si tuas le sens d'nos écouté,
Et n'te pon formalizé
D'lavis que j'tavon bailli,
Tout en bouanne amîqui,
Sus chute fielle de papi,
Tan grand nom sera portait
Loin dans la postéritait;
Et nous r'pâle-la d'tan dîné
Dans la grand salle de Rosé.

Matchi Lé Gé

 

Viyiz étout:

 

Les Pages Jèrriaises