Si ch'avait 'té d'bouonne huile de casto qu'Laizé m'dounni l'sé d'la compagnie, n'y'éthait pon yeu trop a r'dithe: j'ai tréjous yeu pus-ou-mains d'gout pour ch't'huile la - la sienne de siez Pitchet - j'en mets quazi trejous un lermin dans ma salade. Mais dans lus excitation, y s'trompites de boutelle, l'aut'sé. Ch'fut d'l'iélle de mouothue qui m'fites béthe, par sept fais, dans l'couothant d'chutte mémothabye séthée la. La consequence en est que tout ch't'ielle la s'est imbibée dans ma pé, et qu'les gens tchillent le nez partout qu-ès que j'passe.
Y m'ont rayé hort de l'Office: les clients n'voulaient pon acaté d'gazettes que j'avais manié; et y'eut eunne dame qui d'mandi si n'yéthais pon tchiq' rat mort souos l'conteux. Persounne ne veurt travaillyi au pid d'mé atouore de la machine a imprimé; y se sont pliaints qu'lus lunch prennait l'gout d'héthan et qu'lus femmes prétendent qui sentent a guano.
V'la tchi duthi d'même quatr' ou chinq jours, et pis y eut un strike. Y s'en futes dithe au Boss qu'j'empestais, et qu'j'éthais a m'n'allé ou y r'fusaient d'continué a travaillyi. Enfin y'eut du d'vis et du bri, et l'Boss, putot que d'les vaie tous s'n'allé, dit qui s'n'allait faithe des arrang'ments.
Ch'est-tan-tchi, y m'a acaté eunne béque, et j'm'en vais passé eunne tchinzaine a lis foui san gardin a lédjeummes! Nou s'attend a ch'que chutte minzéthabye odeu d'ielle étha fichi l'camp dans l'couothant d'chu temps la. Nou s'est arrangi pour que j'couoche dans un petit shed a otis, sus d'la palle que nou brul'a après, et nos gens m'apportethont mes r'pas dans du papi qu'j'enfouithai dans la rande après avé manji. Touos les siers j'prendrai un bain dans d'l'ieau d'caux, et bou brul'a les habits qu'j'ethai porté tout l'temps - jusqu'és bottes!
L'temps s'en va m'pathaître long dans chu gardin là, et je n'sis pon grand sorte de fouisseux d'terre. Ch' qui m'fait l'pus despié, ch'est qui m'est d'fendu d'embréchi m'n'èsfant duthant que j'sai là, d'crainte qu'ou n'remportéthai l'odeu d'ielle sus ses joes. Ou'l est pour allé au Show d'volaille ov sa méthe y'un d'chés jours - nou pasle d'y'un des juges de d'Gernezi qu'a d'mandé des rensinments sus Lonore - et si par malheu' ou sentait a ielle chu jour là, sa méthe dis qu'nou n'sait pon l'tort qué v'la tchi pouorrait lis faithe.
J'espéthe que rin n'itha d'travers siez nous tandi que j'sai a m'purifié. J'ai d'mandé és clerques d'avé l'yi sus Lonore, et y m'ont promins qu'étha tréjous au mains yun d'yeux a villyi d'sus niet et jour. Mais j'sait bin que je n'dormithai pas trantchille dans man 'shed' ch'est si cag'lin, les filles; nou n'sait jommais tchès qui s'en vont faithe la prechenne chose. Car pour mé fié sa méthe après ch'que nous en liet, dans l'Almana d'la Chronique!
Piteur Pain
Morning News 9/1/1913
Viyiz étout: