Chutte vendue d'bêtes à l'Asile, l'autre jour, s'fit la Merrienne hier au sé, tchèsque tu'en dis, Ph'lip?
Chein qu'j'en dis, j'l'y raiponnit, ch'est que, à prendre yun dans l'autre, les prix 'taient bein trop bas. A une vendue d'férme ils éthaient réalisé bein pûs, mais y fallait s'y attendre, car y n'y'avait autchune réserve et tout l'monde savaient que l'idée du Comité 'tait de s'dêfaithe des vaques et des g'niches à autchun prix.
Mais chein qu'je n'comprends pas, ou dit, ch'est pourtchi qu'chu Comité n'pouvait pas faithe le lait péyi, car tu n't'en vas pas m'dithe qu'un bouon fermyi perd des sous sûs san lait. Y n'y'a p't'être bein hardi d'profit, mais man péthe dîsait tréjous qu'une férme sans béstiaux n'était pas une férme du-tout.
Et il avait raison, j'l'y dit, mais n'oublie pas que tan péthe 'tait là pour survillyi, et tch'y travaillait étout. Les membres du Comité d'la Santé Publique n'hallaient pas lûs câsaques quand ils allaient vîsité l'Asile. Y s'assiévaient autou d'une tablye et 'taient forchis de craithe chein qu'nou lûs dîsait. S'y s'étaient mints à traithe des vaques ou à plianté des patates, y n'éthait pas yeu d'vendue. Enfin, ils en sont tchittes de lûs bêtes, et sans doute y sont contents, mais j'ai dans l'idée que l'Juge Payn, tch'êtablyit la férme d's'Etats, y'a bein d's'années, et l'docteu Labey, tch'y tait si ordguilleux d'ses bêtes, ne sont pas trop confortables dans l'chim'tièthe chais jours.
Bein seux qu'nan, ou dit, mais ach'teu Ph'lip, y'a une autre chose tchi m'veint à l'idée. Tchèsque je f'thons bétôt quand l'temps veindra pour touôné?
J'l'y dit que je n'la comprenais pas, mais j'ajouôtit que sans doute je f'thaimes comme de couôtume. Y'a d's'années ach'teu que, comme tout l'réstant, je [couôtume].
La Merrienne hauchit l's'êpaules. Tu n'as pas considéthé, ou dit, que la pétrole est bein pûs chièthe au jour d'agniet, et que y'étha bein pûs d'couôtage. Combain qu'tu crais que tu'éthas à péyi par le jour, ch'est-à-dithe pour à-bein-près sept vrégies?
Damme! j'l'y dit, il est vrai que je n'y'avais pas pensé, mais ch'est la seule manièthe.
Es-tu bein seux? ou d'mandit. "Est-che que n'y'a pas une autre manièthe. Pense donc un mio pour une fais.
Je m'grattit la tête, épis: Ch'n'est pas qu'tu voudrais touôné comme nous faisait aut'fais, Merrienne? Tu pérds la tête ma vieille. A qu'menchi, ouêsque nou trouv'thait les tchéthues?
Y'en a ocquo souos tchiques tchérquethies ichin et là, ou dit, et y'n'prendrait pas longtemps à les méttre en ordre.
Ch'là s'pouôrrait, j'l'y dit, mais les bidéts, ouèsque-tu t'en vas les trouvé?
Y'en a ocquo tout-plien dans la pâraisse, ou dit. Notre vier Bob pouôrrait ocquo faithe au câgnon, et nou trouv'thait l'réstant sans autchune diffitchulté. A qu'menchi, je s'y bein seuze que l'Jack A'Court et ses frèthes ne dithaient pas nânin, si nou lûs d'mandait pour un couplye. Et notre amin, l'Frainque Avri, y ne s'sait que trop content. Le Percy l'Masuthi veindrait à notre aide, et si nous avait à allé hors de la pâraisse, y'a l'Jack Syvret tch'y pouôrrait foui une cârre. A ma veue, ch'est tout-à-fait simplye.
J'la r'gardit. As-tu caltchulé, Merrienne, tchi faudrait nouôrri tout chu monde-là?
Eh bein, ou dit, y faudrait sans doute lûs donné une bouochie dans la matinée, mais j'pouôrrais faithe une gâche à corinte et pour le dîné y'a ocquo des gobins d'lard dans l'saleux, et j'n'éthais pas d'peine à faithe un podin d'riz.
Tu oublie tchiquechose, j'l'y dit. Y faudrait accaté au mains une doûzaine de bouteilles de litcheu.
La Merrienne tréssautit. Ah! Oh! ou s'êcriyit, si ch'est d'même y faudra s'graie avec le tracteur!
Ph'lip.
1956
Viyiz étout: