Les Pages Jèrriaises

Auve eune pînchie d'sé

Ch'est tréjous un pliaîsi quand les fêtes èrveinnent et qué j'peux m'assiéthe à seule fîn d'èrèrgarder l'film “Mathie Poppins” à la télévîsion, car j'crai bein qu'eune tchul'lée d'chucre aîgue l'aval'lie d'la méd'cinne. Jé n'sis pon seux coumme tchi dithe supercalifragilisticexpialidocious en Jèrriais, mais ch'est cèrtainement eune saquétinne bouochie, et chu film-là est pus d'fanne qu' “Eune Pouongnie d'Dollars”.

Auve eune vèrrée d'tchiquechose (ou bein même eune boutillie) et eune poutchie d'brueûques, eune boêtée d'chocolats ou eune bollée d'nouaix, nou peut r'garder un bouôn film à la télévîsion, ou un vidgo préféthé, ou pouor les cheins tch'ont eune maîsonnée d'itelle technologie - un DVD.

Pouor dé mé, j'n'ai pon acouo acaté un joueux d'DVD. J'ai dêjà assez d'machinn'nie et câbliéthie siez mé auve les compiuteurs et i' n'mé faut pon acouo deux-trais pliatelées d'spaghettis à tchaie dé driéthe ches boêtées d'chorchell'lie modèrne. En tout cas, mes journées et mes séthées sont embarrassées auve l'êcrithie d'pap'sées d'articl'yes pouor la gâzette!

Et v'là tchi m'fait penser qu'j'avons eune bachinnée d'mots pouor lé cont'nu d'choses: j'ai dêjà pâlé des tchul'lées et des bouochies et des vèrrées et des poutchies et des boêtées et tout chenna, mais y'a acouo des bêtchies, des fourquéthées, des pouch'tées, des tinnées et acouo eune dgichonnée d'vielles expressions.

Par exempl'ye, nou peut êt' rêvilyi coumme eune pannelée d'souothis, ou bein dithe qué touos les p'tits tourtchieaux veindront en eune fouônnée.

Mais las, ch'est trop d'travas à penser pus longtemps à eune itelle braichie d'vièrs mots - j'm'en vais èrèrgarder eune télévîsionnée d'films!


Geraint Jennings

 

Viyiz étout:

 

Les Pages Jèrriaises