P't'être qué sus chein qué j'veurs êcrithe
Y'en étha qui trouvthont à r'dithe
Les critiques - et y'en a tréjous
Puorront pâler d'man drôle dé goût
Nou n'trouvtha p't'être pas grand biauté
Drièthe un si drôle dé sujet
Rein qu'une pinchie dé s'no!

Mais y'a d'tchi bé dans bein p'tite chose
Dans un brin d'mousse comme dans une rose,
Si des biautés nou veurt trouver
Faut ouvrir l's'yeux - pas les frumer -
Et l'suns et l's'autres nos entr'-pâlant
J'trouvthons tchic chose d'intéressant
Dans une pinchie dé s'no.

Y'a des gens qui n'en prennent jamais
Ils ont peux à lus dés!
I s'tuonnent d dé bord, bein offensés
Comme si jé l's'avais insultés,
En lus offrant par amiêtchi
Ma boëte ouverte, ov: "Vos p'yait-i
Une bouanne pinchie dé s'no?"

Y'a des grand'-dames dans lus parleux
Qui font laie mine au pouor s'notcheux
I' boulent des yiers comme des souôtasses
Si, par malheur, sa boëte i passe!
Et tandis qu'oul est dêhallée
I font des grignes, et sont boudées
Pour une pinchie dé s'no!

Mais s'ils ont un fré dans la tête
Et qui s'en trouvent tout à fait bêtes
S'i pâlent d'une drôle dé voix enrouée
Et qui sont tout-enchiffrénées:
Dé d'dans la boëte au vier grand-pèthe
I né r'fusent pas, s'i veulent sé r'faithe,
Une bouanne pinchie dé s'no.

Y'a la bouanne femme dans sa boutique,
Tandis qu'ou prône à ses pratiques
Sus tout ch'qui s'passe dans l'vêsiné,
En lus mettant chucre ou café
"Tchest qu'ou lus donne par sus l'marchi
Dévant qu'i sortent ded siez l'yi?"
- Une bouanne pinchie dé s'no.

Et l'cordonn'yi sus sa s'cabelle,
Qui rabihotte nos vieilles sémelles,
Q''apointis trantchillement ses guevilles,
Ou bein qui cache d'la spathabille,
Dans les grosses bottes à ses vêsins
Il a pus d'tcheu quand il a prins
Une bouanne pinchie dé s'no'

Grand-pèthe assis à san tout seu
Dans sa grand'-tchêthe aupi du feu,
Pas fort assez pour travailli
Mais pas malade pour sé quochi,
Tch'est don qu'i f'thait d'matin au ser
Si n'avait pas pour sé d's'enn'yer
Une bouanne pinchie dé s'no?

Une boëte-à-s'no d'papi mâchi...
Ch'n'est pas, bein seux, un bel ôti,
Ch'est vrai q'tchic-fais ch'est d'aut'matchèthe,
D'la corne ou d'l'os ou bein d'l'ivièthe,
Vaithe-mais la boëte est pus q'chonna:
Ch'est une compagne au chein qui l'a
Qu'aime sa pinchie dé s'no.

Tchic fais quand j'vais siez des messieux
Et q'j'entre dans lus biau parleux
J'vé d's'ornements sus l'ais d'foyi,
Des tas d'biautés - un tas d'tchi chi;
Mais y'a une boëte parmi chonna
Que l'moussieu m'offre en m'disant: "Là!
Une bouanne pinchie dé s'no."

"Allons!" jé m'dit, "même par ichin
La boëte à s'no peut faithe san q'min!
Et mais vraiment tchest qu'éthait creu
D'trouver du s'no siez un moussieu?
Faut qu'y'en ait d'autres qué les puoures gens
Qui s'pliaisent à prendre dé temps en temps
Une bouanne pinchie dé s'no."

Es siens qui sont bein moyennés
Les gros cigares sont réservés,
Si nou n'peut pas s'en affaurder
D'une courté pipe faut s'contenter.
Mais quant au s'no ch'est difféthent
Ov le moussieu lé pouorre corps prend
Sa p'tite pinchie dé s'n'o.

Si dans l'hiver siez sans vêzin
Nou va pour prôner un p'tit brin,
Sé du fermage ou bein du temps
Ou d'politique en sé d's'yennyant,
Eche que nou puorrait distchutter
Si d'vant q'menchi nou n's'entr'donnait
Une bouanne pinchie dé s'no.

Siez les messieux, siez les puorres gens,
Dans toutes les classes, dans tuos les rangs,
Tandis q'nou prend sa p'tite pinchie
Combein d'minzèthe est q'nou z'oublie,
- Et l'pus gronneux n'peut pus gronner
Quand j'li d'mande s'i veurt accepter
Une bouanne pinchie dé s'no.

ELIE.