'J'sais bein,' s'fit l'Ph'lip Desclios, 'que t'as passé bein d'ton temps dans les pays cauds, mais tu dai en aver passé dans les pays frais étout?'
'En effet', j'lis rêpounnis, 'et les pus frais 'taient la Corée et l'Afghanistan. Quand j'fus en Corée ch'tait en plein hivé et i'faisait eune fraid d'tchian. Le jour que j'arrivis là ch'tait eun sam'di, et viyant que n'y'avait pas d'travâs d'office le lound'main j' n'me l'vis pas le moment que mon servant m'apportit à siez heures et d'mie de ieau bouoillante pour me raser. J'restis au liet acquo eun'quart d'heure. Mais quand j'me l'vis l'ieau 'tait g'lée, chen n'tait qu'du gliachoun.
Autre qu'eun p'tit grais dans mon parleux n'y'avait autcheun moyen d'cauffer la maisoun. Oulle avait 'te mal soignyie et 'tait presqu' en d'lacre; entre les casses dé f'nêtre et la muraille y'avait eune brecque large assez pour y met'la main, et j'fichais des vielles gazettes dans les brecques pour tachi d'empêchi le vent d'entrer. Dans l'office, qui 'tait à l'étage de bas, y'avait eune manièthe de fournaise qu'avait 'tait faite pour brûler du tcherboun, mais l'tcherboun 'tàit retiounné et chein qu'les Japounnais me permettaient (car dans chu temps-là la Corée faisait partie de l'empithe japounnais) 'tait si p'tit que j'en avais à peine assez pour mon grais d'parleux, sans pâler d'en brûler dans m'n office. Et d'même j'y brûlais du bouais, main i'n'y'avait autcheun moyen d'countroller la fournaise, et djiex minutes après l'aver allumée i' fallait ouvri les f'nêtres pour laissi la caleu s'êcapper, et pis, iune minute pus tard i' fallait tout d'suite les érfreumer, ouvri la fournaise et y pitchi acquo du bouais. Ah, mon Ph'lip, tchi comédie touas les jours'!
'Djâtre sait,' s'fit l'Ph'lip, 'mais tu m'êtounne. Si t'avais 'té fermi coumme me j'éthais bein coumprîns, car i' faut qu'les fèrmiers se dêbrouaillent du meux qui peuvent, mais j'n'éthais jamais creu qu'eun diplomate, éthait ieu à cauffer s'n'office'.
'Mon Ph'lip', j'lis dis, 'v'là tchi dépend de not' rang dans l'Service. S'nous est ambassadeu nous a eune dgaingue de servants qui fount chein qui faut, mais quand nous est dans les bas rangs du service nous dêbrouaille du mus qu'nou peut. Et ch'est eune buoanne chose car, quand il entre le Service eun janne gamin de mettous vingt deux ans est traité avec grande révérence coumme si i' tait le Pape de Roume, i' c'menche à faithe des teurs et i' s'crait en effet bein pus grand qu'i'n' est. Nânnin, i'faut c'menchi au bas d'êtchelle et p'tit à p'tit la mounters nous a l'courage et la capacité.
'Mais tu me d'mande coumment qu'nou s'arrange dans les pays cauds. Eh bein, nou's'y acc'mode. Sauf à Singapour, qu'est presque sus la Lîngne et Bangkok, qui 'est pas fort pus au nord et d'même qui n'ount jamais d'hivé, touas les pays ouesque j'ai 'té ount lus quatre saisouns. En Afghanistan et au Japoun dans l'hivé i' fait fraid à pierre fendre, et trais pids ou pus d'né, tandis qu' l'été noun peu presque pas supporter la chaleu' mais le v'là, le corps humain est dû et sait s'acc'moder.
'En êffet', s'fit l'Philip en riant, 'j'ai bouanne raisoun de saver que l'fèrmi travaille déhors dans toutes les saisouns. Je m'rappelle aver les mains g'lées quand ou tait à plianter au mais d'févri, et suer au mais d'juin, quand ou tait à faithe du fain ou à foui des patates. Mais, coumme tu dis, dans chutte vie i'faut s'acc'moder à tout'.
'Le v'là,' j'lis dis. 'l'houmme peut aller à la leune et marchi d'sus, mais i'n'peut pas c'mander le Buoan Djeu de lis dounner la sorte du temps qu'i' veurt'.
Viyiz étout: