|
Lé travèrs d'un p'tit théodolite en papi j'viyais la paûpil'ye d'eune hardelle. la pus belle hardelle dé toutes, tchi 'tait habilyie raîque en pliastique tchi pâlait d'eune rocque et m'disait chennechîn: "Fai quart pouor lé rouoge trais-carres êcrit, et met d'dans un tîmbre à trais sous; J'm'en vais à dgiêx minnutes dé ieune, dgiêx minnutes ch'est l'heuthe des dginnées, dgiêx minnutes, ché s'sa trop longtemps dgiêx minnutes, tu'arriv'thas lé drein. Véthe, as-tu ouï: Mes dés dêpendent coumme des portraits, et mes seins pouaintent envèrs lé Nord?" J'm'en fus don expliôrer au Pôle, des tenvres ouaîsieaux lus envolîtent auve un sangliot; Là j'ouïs tchitchun sonner à l'us où'est qu'tchiques cŷmbales 'taient mâtées dans eune tcheue; J'les jouis châtcheune à san tou, et ou s'dêhalit bétôt d'eune pouque à main, en dithant chennechîn: "Lé compas heutheux est décidé j'veindrai à dgiêx minnutes dé ieune, dgiêx minnutes ch'est l'heuthe du dgîngneux dgiêx minnutes né s'sont pon assez, dgiêx minnutes, j'y s'sons les preunmièrs, Dêpendez chennechîn, s'i' t'pliaît, véthe dêpendez chennechîn, et des pourpres bouais chant'tont l'èrplyique, des trains tchi rînment lus rencontrent en rigodon, du filin est à fliotter sus l'ieau, j'ouvrons un patchet envyé au deux d'nous; véthe dêpendez chennechîn, des patholes vivantes sont jouées ensembl'ye, l'amour amende au craître coumme un g'veu." Roger Roughton Vèrsion Jèrriaise dé Geraint Jennings
|
Viyiz étout: