Nou-s'a rapporté qu'lé nouvieau-né à Britney Spears a nom Preston et y'a ieu d'l'întéthêt pouor saver si lé p'tchiot avait 'té par chance conchu dans chutte ville-là Angliaîche dans l'Lancashire. Véthe, les Beckhams avaient bâptîsi lus fis, Brooklyn, car i' fut conchu là à Nouvieau York. Mais nou doute si la chant'rêsse Britney, lyi, fut conchue en Brétangne (ou même en "Braytangne"). Nan, ch'est la mode dé donner des noms d'pliaiche ès p'tchiots. À ches drein l'Prînce Harry avait dêcliathé s'n amour pouor sa douoche, Chelsy (et la fil'ye d'l'ex-président Améthitchain et d'la préchaine présidente pôssibl'ye Améthitchaine a nom Chelsea Clinton). Mais ichîn en Jèrri, bein liain d's êtailes d'la tchultuthe populaithe, ch'est-i' la mode étout d'donner ches noms-là ès mousses s'lon par ioù qu'nou les a conchu? Pouor des commentaithes, j'avons pâlé auve un janne coupl'ye Villais, Kevin et Kerré...
| La Rédaction: | Tch'est qu'est san nom, vot' fil'ye-là? |
| Kerré: | San nom est Êlysée, car quand j'nos rencontrînmes ch'fut dans d's appartéments à l'Êlysée qué j'd'meuthêmes auve nos pathents. |
| Kevin: | Et ou fut conchue là. |
| La Rédaction: | Mais ch'est un bieau nom. En sans doute chenna rapporte des mémouaithes. |
| Kevin: | Exactément, et né v'là pouortchi qu'j'avons chouaîsi Collette pouor not' préchaine fil'ye. |
| Kerré: | Véthe, car la chitchette fut conchue quâsiment dans l'ombre d'la cheunm'née d'la stâtion d'pouvé. Mouôn Doue, qué ch'tait romantique chutte séthée-là! |
| Kevin: | Mais j'avêmes considéthé "Folie" étout car j'avêmes 'té à baithe deux d'gouts à l'aubèrge dé La Folie. |
| Kerré: | J'éthais êpaîngni l'nom Folie pouor not' préchain êfant mais ch'fut un garçon, chutte bouonne fais-là. |
| Kevin: | J'n'avêmes pon réalisé qu'i' y'éthait eune compétition d'tith'thie ch't' arlévée-là, et j'fus si tressalé par lé brit qué jé n'mênagis pon d'mett' la capote en bouôn temps. |
| La Rédaction: | Et né v'là pouortchi qu'vot' fis-là a nom Crabbé? |
| Kerré: | Oui, j'dis tréjous qu'Kevin avait tithé au blianc chu jour-là! Mais j'pâssêmes pus liain par les falaises du Nord pouor nos pliaîsièrs la préchaine fais qu'j'avalis un champîngnon, et not' pétit Ronez est solide coumme un rotchi. |
| Kevin: | Et san p'tit fréthe fut conchu là-haut étout. Mais, mes fêsses en grénottent acouo en y pensant car i' ventait la pé du dgiâbl'ye l'jour qué j'pliantis lé p'tit Frémont. |
| Kerré: | Tes fêsses! Tu m'martéllais si dû qué j'avais peux d'bouler ava les falaises, valet! Et né v'là pouortchi qué j'èrnonchînmes l'amour des côtes du Nord pouor èrvénîn en Ville. |
| La Rédaction: | Car ous avez justément ieu d'la nouvieauté siez vous? |
| Kerré: | Oui-dgia! Né v'chîn not' pétite cannotte dé souaie. Qu'oulle est belle! |
| Kevin: | Et acouo eune fais, j'avons prîns san nom dé ioù qu'ou fut conchue et, ma fé, ch'est un bieau nom. |
| Kerré: | Véthe-dgia. Cou-cou, fai dêdée au moussieu, fai dêdée au moussieu, ma p'tite Bellozanne! |
Viyiz étout: