La s'maine pâssèe, vos musiciens
Pour trais jours dé temps sans cèssi
Ont jouè et chantè - ch'tait ès cheins
Tchi pouôrraient faire lé pus dé br'it!
Y'iavait là des Soprânos, des Contraltos
Des vouaix de Basse, dé Bariton,
Des chanteurs dé biaûx Solos,
Et d'aûtres y jouaient piano, violon.
Y'iavait des prix a y gâgni,
Tous n'en ont pas yieu pourtant,
Les uns allaient trop vite, qu'nou dit,
D'aûtres né gardaient pon lé temps.
Tchiq's'uns étout étaient nerveux,
D'unn' dièze i l'en faisaient bémole,
Ch'tait surprénant, car hardi d'yieûx
Sortaient d'unn' bouanne èscole!
Les jours dé d'vant, à chein qui paraît,
Les apototchiers avaient fait grand d'bit
Dé chès p'tits Lozinge pour la vouaie,
Qué les chanteurs s'pliaîsent à chuchi...

Enfin tout s'est don bein pâssè,
L'affaire amende un mio touôs l'ans,
Et si l'Comité est raide lâssè,
I'l'a fait d'san mus pour pliaîre ès gens.

Eh bein, Villais, ov' toute vot' belle musique,
Y'ièn a d'unn sorte qu'ou n'entendèz pas:-
Ch'est la mélodie tchi sort d'unn' vlique,
Et tchi nos vaût mus qué l's Opéras!
Ah lé plaîsi qu'ou nos fait, chutte musique là,
Si nou s'est dans les terres à labouôrer,
Et ch'est sus lé coup d'douze qué nou l'entendra,
Quand la bouann'femme corne pour v'nin dîner!...

J.P.
1911

La s'maine pâssée, vos musiciens
Pour trais jours dé temps sans cêssi
Ont joué et chanté - ch'tait ès cheins
Tchi pouôrraient faithe lé pus dé brit!
Y'avait là des Soprânos, des Contraltos
Des vouaix de Bâsse, dé Bariton,
Des chanteurs dé bieaux Solos,
Et d'aut's y jouaient piano, violon.
Y'avait des prix à y gângni,
Tous n'en ont pas ieu pourtant,
Les iuns allaient trop vite, qu'nou dit,
D'aut's né gardaient pon lé temps.
Tchiq's'uns étout étaient nèrveux,
D'eune dièze il' en faîthaient bémole,
Ch'tait surprannant, car hardi d'ieux
Sortaient d'eune bouonne êcole!
Les jours dé d'vant, à chein tchi pathaît,
Les apotitchièrs avaient fait grand d'bit
Dé ches p'tits Lozinges pour la vouaix,
Qué les chanteurs s'pliaîthent à chuchi...

Enfîn tout s'est don bein pâssé,
L'affaithe amende un mio touos l's ans,
Et si l'Conmité est raide lâssé,
Il a fait d'san mus pour pliaithe ès gens.

Eh bein, Villais, auve toute vot' belle musique,
Y'en a d'eune sorte qu'ou n'entendez pas:-
Ch'est la mélodie tchi sort d'eune vlique,
Et tchi nos vaut mus qué l's Opéras!
Ah lé pliaîsi qu'ou nos fait, chutte musique-là,
Si nou-s'est dans les tèrres à labouother,
Et ch'est sus l'coup d'douze qué nou l'entendra,
Quand la bouannefemme cône pour v'nîn dîner!...
 
J.P.