La Litcheu du Jour de Naîssance
Ches jours le Ph'lip Desclios a bein a faithe sus sa ferme mais, tout d'même, i'trouvit l'temps l'aut' se de v'ner m'payi visite.
'Tu m'pâlais y'a tchiqu' temps,' i'm'dit,'d'eun fameux jour de naissance que t'eus dans ton janne temps au Japoun mais j'eus a m'en aller devant qu'tu n'pûsses m'en racounter le m'nu. Tchi qu'i's'arrivit?'
'Eh bein,' j'lis fis. 'Ch'tait la couôteume parmi les jannes membres éd l'ambassade, les souas-officiers et sécrétaithes d'inviter lus collègues de v'ner béthe eune fais lus jours de naissance mais l'mein, mon vingt-siexième, ch'tait en fevri mil neu chent quarante, s'adounnit que tchiques jours devant mes derniers exameins en japounnais et j'voulais à tout coumpte les passer. De même, je n'voulais autcheune distractioun d'vant et, la séthée d'mon jour de naissance, j'tais enfouncé dans mes études et j'n'invitis persounne.
'Mais mes collègues d'ambassade s'avistent que ch'tait là l'jour et i'n'allaient pas mantchi lus fais à béthe; et à siex heuthes n'en v'la eune vingtaine qu'arrivent siex me, que j'n'attendais pas.
'Tchi dgiable faithe? J'n'avais pas eune goutte de litcheu, pas même eune bouteille de biéthe, dans la maisoun, et j'd'mandis à ma servante, la chiéthe buonnefemme, Kano San, coumment qu'j'allaimes nos en dêhaller.
'Ne vos en gênez pas,' ou m'dit. 'Amusez vos collègues pour dgiex minutes avec vos histouaithes et j'm'en vais soigni d'la bouaissoun.' Et la v'là horte.
En effet, dgiex minutes pus tard la v'là qu'entre avec toutes sortes éd litcheu, du whiskey, du dgeinne, d'la biéthe et tout ch'qu'i' fallait. Et oulle en avait tout plein d'pus dans la tchuiseinne car, aussitôt qu'eun verre 'tait viéde, oulle remplyssait.
J'eumes eune raide buoanne séthée qui duthit jusqu'a dgiex heurthes passées et, j'm'en vais t'dithe, mon Ph'lip, la bordée n'fit autcheun tort à mes exameins que j'passis avec grand mérite.
'Quand l'dernyi d'mes visiteurs s'en fut, j'érmercis Kano San et li d'mandis à tchique qu'j'dévais toute chutte litcheu.
'A persounne,' ou'm' dit.
'Allouns, allouns,' j'li fit. 'Tu sais aussi bein qu'me que j'n'avaimes pas d'litcheu et acquo t'en as produit eun amâs. Tu dais l'aver ieu d'tchiqu'eun et j'faut que j'l'érpaye.'
'Maitre,' ou m'répounnit. 'Ou savez bein qu' l'Attaché Militaithe allemand reste eune siezème de maisouns ava la route.
'Nous, les Japounnais, ne pouvouns pas l'souffri et sa servante, qu'est ma parchounnièthe, le déteste. J'sis allée la vaie lis d'mander s'ou'pouvait m'dounner la bouaissoun qu'i' vos fallait.
'Mais certainement,' ou' m'dit. 'Il est hors a tchique réceptioun à s'n ambassade mais j'ai la clié à son cabinet d'litcheu, prends en autant qu'tu veurs; il en a tant qu'i'n'la manquera pas.'
'Et d'même,' countinuit Kano San, 'ou' n'pouvez pas l'érpayi car, si je n'me troumpes pas, vot' pays est en dgèrre countre l'Allemangne, et si ou l'érpayaîtes ou's'raient à traffitchi avec l'enn'mi et ch'est countre la louai et d'même, ou viyies, ou' n'pouvez rein y faithe.'
La chiethe Kano San, coumme tréjous, oulle avait raisoun.
Et pis, ch't Attaché Militaithe là 'tait eun vrai salaud d'Nazi et j'sis seux qu'la seule chose de buoanne qu'il ait jamais fait ch'tait d'aver produit, bein seux sans l'saver, la litcheu pour mon jour de naissance.
Le vièr Trin'tais
Viyiz étout: