'Dans l'vièr temps,' j'dis à Ph'lip Desclios l'aut' jour, 'y'avait eun pêtchi au Bouôlay, le Georges Le Roux, qu'allait dans son baté, sou-disant pour vièdgi ses pôts d'paissoun mais en vérité pour rencountrer des batcheaux d'France qu'am'naient d'ieau d'vie, pour tchi i'taient paiyis le prix d'France mais tchi que l'Georges érvendait itchein en Jèrri à grand profit car, dans chu temps-là, l'ieau d'vie couâtait hardi d'sou itchein.
'Eune bordée q'il avait bû eune goute et pus d'ieau d'vie qu'i' r'v'ner d'ramasser, i' veint pour aterrer au Bouôlay, tchit d'son baté et, puis qu'i n'savait pas n'nadgi et 'tait la maintchi puiss'qui pliein, i'finit par s' n'yer.
'Quand les Trin'tais entenditent ches mauvaises nouvelles, i' décident que l'Georges Le Roux d'vait êt' enterré avec cérémonie, et d'même quatre messieus dans lus frâcks et hauts chappieaux s'en futent avec eun hèrnais d'ferme puour ramasser l'cadavre, qu'i' couvritent avec eun nièr drapé. Mais souas l'drapé n'y'avait pas qu'en seul coffein, mais deux, dans ieun le pouôrre Georges et dans l'aut' l'ieau d'vie pour tchi que l'Georges avait si noblyiément dounné sa vie. Et les v'la hors amount l'mont ès Crouais, éyou dans l'temps y'avait eune maisoun éyou qu'nou érchevait les cauffres pour que les gens pûsent payi lus derniers réspets devant l'entèrrement, et i' mîntent eun cauffre qu'i' criyaient 'tait l'sien à Georges là-dans et l'autre, qu'i' criyaient 'tait l'sien pliein d'ieau d'vie, dans eune chambre e'drièthe à tchi que l'publyi n'avait pas accès.
Le jour de l'entèrrement, i' prîntent le cauffre dans la chambre èd d'vant le porter au tchim'tchiéthe, suit du sien d'la chambre èd drièthe sus eune chiviéthe et il' en enterrîtent ieun et muchitent l'aut' pour le moment drièthe l'églyise, allant le qu'si quand n'y'avait persounne là.
'Chen 'tait pus tard dans la journée qu'i' dêcouvritent lus mêprînse. I' futent en pâler au Recteu', qu'avait li-même eun intérêt dans l'ieau d'vie.'
"Mes garçouns," i' lus dit, "ch'est eune affaithe que non' n'peu pas laissi d'même car" - en lus faisant eun clyîn - "ch'n'essrait pas du tout hein d'enterrer d'ieau d'vie dans eune pliyaiche sacrée. Mettez par les c'mîns que l'tchian du Bouôlay ess'sa du bord du tchim'tchiéthe et les gens qui n'ount pas affaithe là restérount siez sé, car i' l'en ount eune mortelle peux du tchian. Et pis, à ces sé, quand i' fait nyiet, allez avec des lanternes d's'enterrer l'ieau d'vie et l'rempliaichi par le cauffre èd Georges et, en r'venant, entrez ichein car ch'est me, coumme Recteu', qu'a drouait à la preumier' goutte, et j'pouarrouns tous en aver eune fais ensemblye."
'Vlà tchi n'm'êtounne pas,' s'fit l'Ph'lip Desclios. 'Si j'avais fait eune mêprînse de même, j'n'éthais pas nin'tout laissi d'la bouanne ieau d'vie enterrée - au tchim'tchiéthe ou n'importe éyou. L'ieau d'vie est autrement pus importante qu'eun cadavre. Et, pâlant d'ieau d'vie, t'en n'éthais pas, par chance, deux d'gouts à m'dounner? Car, vais-tu, v'là tchi m'doun'nait l'couorage de ramounter la route siez mé.'
Viyiz étout: